मिस्टर नेपालीमा भुवन केसीको दोहोरो चरित्र ‘नायक र खलनायक’

ज्ञानु पंगेनी
कावासोती । देवचुली फिल्मस्को ब्यानरमा निर्माण हुन लागेको नयाँ नेपाली कथानक चलचित्र ‘मिस्टर नेपाली’को छायाँङ्कन नवलपुरमा भईरहेको छ । चलचित्रको ४० प्रतिशत काम पुरा भएको चलचित्रका म्यानेजिङ्ग डाईरेक्टर गणेश सापकोटाले जानकारी दिए । गत जेठ २१ गते देखि नवलपुरको कावासोती पिठौलीमा चलचित्रको सुटिङ्ग चलिरहेको छ । चलचित्रको ७५ प्रतिशत सुटिङ्ग कावासोतीमा नै हुनेछ ।
कथाले मागे अनुसारको लोकेशन गुगलमा खोज्दा नवलपुर उचित लागेपछि यहा आएको सापकोटाले बताए । चलचित्रले राष्ट्रियताको कथालाई रमाइलो तरिकाले उठान गरेको र यस चलचित्र विशुद्ध मनोरञ्जनात्मक रहेको म्यानेजिङ्ग डाईरेक्टर साप्कोटाको भनाई छ । चलचित्रले विशेषगरि विदेशमा रहेका नेपालीहरुमा नेपालप्रतिको मायालाई झल्काउने र पारिवारीक समेत रहेको सापकोटाले बताए ।
प्रेमराज दाहालको निर्माणमा तयार हुन लागेको चलचित्रमा देव नारायण भुषालको लेखन तथा निर्देशन छ । यस चलचित्रमा नायक भूवन केसी र नायिका रीमा विश्वकर्माको जोडीलाई दर्शकले पर्दामा हेर्न पाउने छन् । नायक भुवन केसी दोहोरो चरित्रमा देखिदैछन् । नायक र खलनायक दुवै भुमिकामा चलचित्रमा देखिनेछन ।
नायक भुवन केसीले आफ्नो संक्षिप्त भनाई राख्दै चलचित्रमा दर्शकले आफुलाई पृथक भुमिकामा देख्न पाउने बताए । उनले भने – ‘ मैले लामो समय भएको थियो चलचित्र नगरेको मैले सोचेको जस्तो भुमिका पाएको थिईन । तर मिस्टर नेपालीको कथा सुनेपछि मलाई मेरो भसमिका पृथक लाग्यो त्यसैले चलचित्र खेले । ’ उनले थपे ‘मलाई यस चलचित्रमा दर्शकले नायक र खलनायक दुवै भुमिकामा देख्न पाउनुहुन्छ । जुन अन्य चलचित्रमा भन्दै पृथक छ । ’

चलचित्रमा मूख्य भुमिकामा भने नयाँ कलाकारको रुपमा साहिल श्रेष्ठ र कुसुम राउतले काम गरेका छन् । यी दुवैले यसै चलचित्रबाट डेब्यु गरेका हुन । यस्तै चलचित्रमा बिष्णु सापकोटा, सुरेन्द्र केसी, कमलमणी नेपाल, राजेन्द्र गिरी, अर्जुन खत्री, सन्तोष लामा, नन्दु श्रीवास्तव, अनिता गीरी, आशिस गिरि, सरोज खनाल, रवि डङ्गोल लगायतका कलाकारहरुको अभिनय रहेको छ । चलचित्रमा हिमाल केसीको एक्सन, सुभाष भुषाल र दिपक शर्माको संगीत, कविराज गहतराजको नृत्य निर्देशन रहेको छ ।
चलचित्रको ७५ प्रतिशत काम नवलपुरको कावासोतीमा गर्ने र बाँकी २५ प्रतिशत काम काठमाण्डौमा गर्ने म्यानेजिङ्ग डाईरेक्टर सापकोटाले जानकारी दिए ।