मानव अधिकार समूह विनयी त्रिवेणीको वैठक सम्पन्न

नवलपुर । मानव अधिकार समूह विनयी त्रिवेणीको पहिलो वैठक शुक्रबार दुम्किवासमा बसेको छ ।
समूहका संयोजक धर्म वहादुर जिशीको अध्यक्षतामा बसेको वैठकले गाउपालिकाभित्र अखाद्य पदार्थहरु मिसावट र म्याद नाघेका सामाग्री विक्री वितरण गर्ने गरेको पाईएकाले बजार अनुगमन गर्नका लागि सम्बन्धित निकायलाई ध्यानाकर्षण गराउने निर्णय गरिएको छ ।
यस्तै यहाँका कतिपय स्वास्थ्य चौकीहरुमा निशुल्क पाउनुपर्ने औषद्यि उपलब्ध नभएको , गर्भवती हुने महिलाहरुलाई सुत्केरी हुने बेला जटिल केशहरुमा स्वास्थ्य चौकीहरुमा दक्ष जनशक्तिको अभावमा आमा र बच्चाको ज्यानै जोखिममा पर्ने अवस्था रहेकाले यस समस्यालाई निराकरण गर्न सम्बन्धित पक्षहरुसंग छलफल गरि पहल गर्ने निर्णय समेत गरिएको संयोजक जिशीले जानकारी दिए ।
यसैगरि गाउपालिका भित्रका विभिन्न वडाहरुमा उच्च शिक्षाका शैक्षिक संस्थाहरु नहुँदा दुम्किवासमै आउने पर्ने अवस्था रहेको र जंगल क्षेत्रबाट आवतजावत गर्नुपर्ने बाध्यता हुँदा किशोरीहरुमाथी विभिन्न किसमका हिंसाका घटनाहरु समय समयमा भईरहेकाले यस समस्यालाई पनि समाधान गर्न आवश्यक पहलकदमी उठाउने निर्णय गरिएको छ ।
वैठकमा सहभागि समूहका सदस्यहरुले शिक्षा, स्वास्थ्य, खाद्य र आवासका क्षेत्रमा रहेका आपल्ना आफ्ना वडाहरुको समस्या राखेका थिए । वडा नम्बर ६ मा उखुको उचित मुल्य पनि नपाउने र समयमा भुक्तनी पनि नपाउदा किसानहरु मरमा परेको ६ का सदस्य जमिर अन्सारीले बताए ।

ईन्सेक गण्डकी प्रदेशको आयोजनामा मानव अधिकार संरक्षण र सम्बर्धनका लागि राज्यको जवाफदेहिता र जनताको सहभागीता अभिबृद्धि कार्यक्रम अन्तगत गठित उक्त मानव अधिकार समूहले मानव अधिकार रक्षाका लागि सम्बन्धित निकायलाई घच्घच्याउने र मानव अधिकारबाट बञ्चित नागरिकहरुलाई अधिकार प्राप्तीका लागि पैरवी गर्ने काम गर्ने इन्सेक सहजकर्ता ज्ञानु पंगेनीले जानकारी दिईन् ।