प्रहरीको सक्रियतामा आगो ताप्दै नवलपुरका स्थानिय

भिम भुसाल
कावासोती । बिगत केही दिन देखि नवलपुर सहित देशमा बढेको चिसोले जनजिवन प्रभावित भइरहेको समयमा समुदाय प्रहरी साझेदारी कार्यक्रम अन्तरगत जिल्लाको विभिन्न स्थानमा आगो ताप्ने ब्यवस्था मिलाईएको छ । समुदाय प्रहरी साझेदारी कार्यक्रम अन्तरगत जिल्ला प्रहरी कार्यालय नवलपुरले जिल्लाका बिभिन्न स्थानमा आगो बालेर सर्वसाधारणहरुलाई आगो ताप्ने ब्यबस्था मिलाएको छ । आम नागरीकहरुलाई न्यानोको अनुभुती गराउन जिल्ला प्रहरी कार्यालय नवलपुरले कावासोतीको फलफुल चोक, सभापती चोक, थकाली चोक र थाना चोक तथा विनयी त्रिवेणी गाँउपालिकाको दुम्कीवास क्षेत्रमा दाउरा बाली सर्व साधरणहरुलाई न्यानोको प्रत्याभुती दिलाईएको प्रहरीले जनाएको छ ।

त्यस्तै जिल्ला प्रहरी कार्यालयले जिल्लाका अन्य ईलाका तथा अस्थाई पोष्टहरुलाई पनि स्थानीय चोक तथा ग्रामिण ईलाकाहरुमा आगो बालेर ताप्ने ब्यबस्था मिलाउन निर्देशन दिएको छ । प्रहरी कार्यालयहरुले स्थानीय तहसंगको समन्वयमा बिभिन्न स्थानमा आगो बालेर ताप्ने ब्यबस्था मिलाउन भनि निर्देशन दिएको जिल्ला प्रहरी कार्यालय नवलपुरले जनाएको छ । त्यस्तै चिसो बढ्दै गएपछि डिभिजन वन कार्यालय नवलपुरले जिल्ला भरका सामुदायिक वनलाई आगो ताप्न सहयोग पुग्ने गरी दाउरा वितरण गर्न अनुरोध गरेको छ । पछिल्ला दिनहरुमा अत्यधिक चिसो र शीतलहरबाट जनजीवन प्रभावित भएको भन्दै त्यसबाट जोगिन सार्वजनिक स्थानहरुमा आगो ताप्नका लागि सार्वजनिक स्थल र घरहरुमा समेत न्यानो बनाउन दाउराको व्यवस्था मिलाईदिन सामुदायिक वन उपभोक्ताहरुलाई आग्रह गरेको हो । जिल्ला विपद् व्यवस्थापन समितिबाट निर्णय नै गरी आफ्ना सदस्य सहित सार्वजकि स्थलहरुमा सार्वजनिक उत्तरदायीत्वको ठानी दाउरा उपलब्ध गराउन सार्वजनिक सूचनानै जारी गरेर अनुरोध गरेको हो । साथै तत्कालै दाउरा आवश्यक परेमा जिल्ला वन पैदावर आपूर्ति समिति नवलपरासी वर्दघाट सुस्तापूर्व मा सम्पर्क राख्न सकिने र समितिले तोकेको दररेटमा दाउरा उपलब्ध गराउने डिभिजन वन कार्यालय नवलपुरले जनाएको छ ।