प्रेस संगठन नेपाल नवलपुर जिल्लाको सपथ ग्रहण

कावासोती । प्रेस संगठन नेपाल नवलपुर जिल्लाको सपथ ग्रहण कायक्रम सम्पन्न भएको छ । सपथ ग्रहणसंगै प्रेस संगठन नेपाल नवलपुरले पुर्णता पाएको छ । साविक प्रेस चौतारी नेपाल र प्रेस सेन्टर नेपालको केन्द्रगत रुपमा एक भएसंगै मातहतका जिल्ला संगठनको संयोजक र सह संयोजक घोषणा गरिएको थियो ।
गण्डकी प्रदेश कमिटीले जिल्ला संगठनको नामावली टुङ्गो लागेसंगै एकता पछिको पहिलो कार्यक्रमको रूपमा जिल्ला संगठनको शनिबार पद तथा गोपनियताको सपथ ग्रहण गराईएको हो ।

सपथ ग्रहण कार्यक्रममा बोल्दै नेकपा केन्द्रिय सदस्य तथा प्रतिनिधि सभा सदस्य तिलक महतले देशको विकास र समृद्धिका लागि संचार जगतको महत्वपुर्ण भुमिका हुने भन्दै सरकारले गरेका कामहरुको प्रचार प्रसार र रचनात्मक सुझाव समेत दिन आग्रह गर्नुभयो । सांसद महतले सरकारले गरेका राम्रा कामको समेत प्रचार प्रसार गर्न नसक्दा आम नागरिकमा समेत निरासा आएको भन्दै समृद्ध नेपाल सुखी नेपालीको लागि सरकारका पक्षबाट भएका काम जनता बीच प्रचारात्मक रुपमा लैजान आग्रह समेत गर्नुभयो । कार्यक्रममा बोल्दै प्रेस संगठन नेपालका केन्द्रिय संयोजक महेश्वर दाहाल, गण्डकी प्रदेश इन्चार्ज गणेश पाण्डे, प्रेस संगठनका केन्द्रीय सदस्यहरू सालिकराम नेपाल लगायतले पत्रकारको न्युनतम पारिश्रमिक लागु गरेरै छाड्ने बताउदै मिडिया काउन्सिल विधेयकमा पत्रकारको परीक्षा लिने प्रावधान प्रेस संगठनकै नेतृत्वमा हटाएको बताउनु भयो । प्रेस संगठनमा आवद्ध पत्रकारहरुले सत्य तथ्यमा आधारित रहेर समाचार सम्प्रेषण गर्न समेत आग्रह गर्नुभयो ।