कावासोतीमा करेसाबारी तरकारी खेती तालिम सुरु

ज्ञानु पंगेनी
नवलपुर  । कावासोती नगरपालिका दुईमा रहेको हिमचुली सक्रिय महिला समूहको आयोजनामा तीन दिने करेसाबारी तरकारी खेती तालिम विहिबारबाट सुरु भएको छ । तालिमको एक कार्यक्रमकाबिच कावासोती नगरपालिका वडा नम्बर दुईका वडा अध्यक्ष लक्ष्मि प्रसाद पौडेलले उद्घाटन गरेका छन् । उद्घाटन कार्यक्रममा सम्बोधन गर्दै वडा अध्यक्ष पौडेलले तीन दिनसम्म सक्रिय रुपमा सहभागी भएर तालिममा प्रदान गरिएको जानकारी ग्रहण गर्न आग्रह गरे । आफ्नै घरवरिपरीको करेसाबारीमा आफ्नालागी आवश्यक पर्ने तरकारी उत्पादन गर्न सके मात्रै पनि बजारको विषदीयुक्त तरकारी खान नपर्ने भन्दै स्वाथ्य रहन मदत पुग्ने बताए । अध्यक्ष पौडेलले तालिममा सिकेको शीपलाई व्यवहारमा लागु गर्न समेत सहभागीलाई आग्रह गरे ।

हिमचुली सक्रिय महिला समूकी अध्यक्ष लक्ष्मि पाण्डे पोख्रेलले अध्यक्षतामा भएको कार्यक्रममा कावासोती नगरकार्यपालिका सदस्य सपना परियार ,दुई नम्बर वडा सदस्यहरु शिव पाण्डे , झमन सिंह कानुङ्ग मगर , भुमा सिंजाली , नेपाल रेडक्रश सोसाईटी कावासोती उपशाखाका अध्यक्ष वेद प्रसाद न्यौपाने लगायतको आतिथ्यता रहेको थियो ।
वडा नम्बर दुइको आर्थिक सहयोगमा तालिम संचालन गरेको समूकी अध्यक्ष पोख्रेलले जानकारी दिईन् । संस्थाले समेत ३७ हजार ५ सय लगानी गरेको अध्यक्ष पोख्रेलले बताईन् । करेसाबारी तालिम व्यवहारिक तालिम भएकाले तालिमपछि महिला दिदीबहिनी तथा सहभागीहरुले आफुले सिकेको शीप प्रयोग गरेर घरमै तरकारी उत्पादन गर्न सक्छन् जसले गर्दा वरपरको जग्गाको सदुपयोग हुने र बजारबाट तरकारी खरीद गर्न नपर्दा आर्थिक भार समेत केहि कम हुने भएकाले तालिम उपलब्धीपूर्ण हुने विश्वास लिएको पोख्रेलले बताईन् । तालिममा सिकेको शीपलाई प्रयोग गर्न प्रत्साहन गर्न बीउबीजन र कृषि औजार समेत वितरण गरिने पोख्रेलले बताईन् ।

तालिममा वडा नम्बर दुईका महिला पुरुष गरेर करीब ५० जनाको सहभागीता रहेको छ । तालिममा कवासोती नगरपालिका कृषि शाखाका प्राविधिक विकास खनाल र देवचुली नगरपालिकाका कृषि शाखा प्रमुख नरेन्द्र भण्डारीले सजहीकरण गर्ने जनाईएको छ ।