बौदिकालीमा जनताको सहभागितालाई जोड, ‘बौदिकाली योजना आयोग’ गठन गरिने

दयाराम आचार्य । कावासोती ।
नवलपरासी पूर्वको पहाडी गाउँपालिका अन्र्तगत पर्ने बौदिकाली गाउँपालिकाले जनताको सहभागितालाई जोड दिएको छ । जस अनुसार ‘उपभोक्ताको जिम्मा’ कार्यक्रमको शुरुवात गर्ने भएको छ । गाउँपालिकाको पाँचौ गाउँसभामा अध्यक्ष दुर्गा बहादुर रानाले प्रस्तुत गर्नुभएको नीति तथा कार्यक्रममा उपभोक्ता समिति मार्फत सञ्चालन हुने आयोजनाहरुको निर्माण सम्पन्न भई फरफारक भएपछि दीर्घकालसम्म आयोजनाको सञ्चालन, व्यवस्थापन र मर्मत सम्भार स्वय उपभोक्ताहरुलाई जिम्मेवार बनाउने नीति लिएको छ । जसका लागि गाउँपालिकाको समन्वय र सहकार्यमा ‘उपभोक्ताको जिम्मा’कार्यक्रम शुरु गरिनेछ ।
स्थानीय योजनाहरुको छनौट र प्राथमिकरणलाई बैज्ञानिक बनाउन आवश्यक नीतिगत सुझावहरू दिन बौदिकाली गाउँपालिका उपाध्यक्षको नेतृत्वमा बौदिकाली गाउँपालिका क्षेत्र भित्रका बौद्धिक व्यक्तित्व, समाजसेवी व्यक्तित्व,राजनीतिक दलका प्रतिनीधिलाई समेत समावेश गरी ‘बौदिकाली योजना आयोग’ गठन गरिने नीति तथा कार्यक्रममा उल्लेख गरिएको छ । गाउँपालिकाका सबै योजनाहरू छनौट वैज्ञानिक र योजनावद्ध होस भनेर योजना आयोग गठन गर्न लागिएको गाउ“पालिकाका प्रमुख प्रशासकीय अधिकृत प्रदिप चन्द्र सुवेदीले बताउनुभयो । यसले योजनामा सबैको अपत्व हुने र विकासले गति लिने विश्वास लिईएको उहाँले बताउनुभयो ।
आगामि वर्षबाट ‘सबैको सडक,सबैको सहभागिता –स्तरीय सडक,हाम्रो प्रतिवद्धता ’को शुरुवात गरिने छ । बौदिकाली गाउँपालिका क्षेत्रका सम्पूर्ण सडकहरुलाई समेट्ने गरी ‘बौदिकाली यातायात गुरुयोजना’लाई कार्यान्वयमा ल्याइने जनाइएको छ । एकिकृत खानेपानी व्यवस्थापन गुरुयोजना, एक घर –दश फलफुलका विरुवा कार्यक्रम सञ्चान गरिने उल्लेख गरिएको छ । एकिकृत बौदिकाली विकास गुरुयोजना निर्माणका लागि आवश्यक व्यवस्था गरिने, फोहरमैला व्यवस्थापनकालागि ‘जनता गाउँपालिका साझेदारी’ अवधारणको शूरुवात गरी जनाइएको छ ।
कर्मचारीको कार्यसम्पादनलाई प्रभावकारी बनाउन ‘वैज्ञानिक प्रोत्साहन प्रणाली ’ लागु गर्ने,गाउँपालिकाबाट प्रदान गरिने सेवाको गुणस्तरमा सुधार गर्दै प्रकृया सरलीकृत गर्ने र सेवामा सर्वसाधारण जनताको पहुँच अभिवृद्धि गर्ने नीति लिइने प्रमुख प्रशासकीय अधिकृत सुवेदीले जानकारी दिनुभयो ।