विनयी खोलाको अवलोकन : कटान नियन्त्रणकालागि काम हुने

दयाराम आचार्य
दुम्किबास । नवलपुरको विनयी त्रिवेणी गाउँपालिकामा विभिन्न स्थानमा विनयी खोलाले गरेको कटानको आज अवलोकन गरिएको छ । सांसद तिलक महत, गण्डकी प्रदेश सभा सदस्य जनकलाल श्रेष्ठ, प्रमुख जिल्ला अधिकारी पिताम्बर घिमिरे, गाउपालिका अध्यक्ष डम्बर बहादुर जिसी, सिचाई कार्यालयका प्राविधिक सहितको टोलीले आज विनयी खोलाले गरेको कटानको अवलोकन गरेको हो ।
विनयी त्रिवेणी गाउँपालिका वडा नम्बर ४, सर्दीको चुकाहा, खयरघारी लगाएतका स्थानमा विनयी खोलाले गरेको कटान र यसले पुर्याउन सक्ने थप जोखिमको बारेमा सांसद तिलक महत सहितको टोलीले अवलोकन गरेको हो ।
विनयी त्रिवेणी गाउँपालिका –४,को गौदी, चुकाहा क्षेत्रमा खोलाको कटान बढदै गएको र यस क्षेत्रका गाउँनै जोखिममा पर्न सक्ने भन्दै स्थानियले चिन्ता व्यक्त गरेपछि सांसद सहितको टोलीले यस क्षेत्रको अवलोकन गरेको हो ।
विनयी खोलाको कटान गाउँतर्फ सोझिएकाले यसले वडा नम्बर ४ को गौदी, चुकाहा, शान्ति नहर, नयाँगाउँ, बगैचा, डाइभर टोल, कोलटाँडी, किर्तीपुर,खयरघारी लगाएको क्षेत्रमा समेत जोखिम बढन् सक्ने भन्दै स्थानियले चिन्ता व्यक्त गरेका थिए ।
खोलामा अबैध रुपमा नदिजन्य पदार्थ निकासा गर्दा समेत क्रमश गाउँतर्फ कटान बढदै गएको भन्दै यसको रोकथामका लागि प्रहरी प्रशासनले समेत पहल गर्नुपर्ने स्थानिएको माग रहेको थियो ।
विनयी खोलाले खएर घारीस्थित विद्युत टावर समेत लडाएको छ । होङ्सी सिमेण्टमा विद्युत आपूर्तीकालागि निर्माण गरिएको टावर बाढीले बगाएको हो । यस स्थानबाट समेत खोला बस्ती तर्फ सोझिएकाले यसको नियन्त्रणमा पहल गर्न स्थानियले माग गरेका छन् ।
खोलाको अवलोकन गर्दै सांसद तिलक महतले चुकाहा, गौदी क्षेत्रमा खोलाको कटान रोक्नकालागि केही दिन भित्रमानै कार्य शुरु हुने बताउनुभयो । खोलाको कटान नियन्त्रणकालागि आवश्यक पर्ने तारजाली उपलब्ध गराई तत्काल काम अगाडि बढाइने बताउनुभयो । यस्तै खयरघारी क्षेत्रमा समेत प्राविधिकहरुको सल्लाहा अनुसार रोकथामकालागि ग्याविनहरू बनाइने उहाँले बताउनुभयो । ‘विनयी खोलाको कटानले जोखिम बढेको छ, यसको रोकथामकालागि आवश्यक कार्य गर्छौ’ सांसद महतले भन्नुभयो ।
सांसद तिलक महत सहितको टोली दुम्किबासस्थित बिनयी खोलाको पुलको समेत अवलोकन गरेको छ । पुलको पूर्व तर्फको भागमा सवारीले ठक्कर दिँदा पुल जीर्ण बनेकाले थप क्षती हुन नदिन सरोकारवालासँग आवश्यक समन्वय आफूले गर्ने सांसद महतले बताउनुभयो ।
यस्तै सोही क्रममा वडा नम्बर एकस्थित विनयी खोलाले कटान गरेको क्षेत्र जोगीकुटीमा समेत अवलोकन गरिएको थियो । खोलाको कटान नियन्त्रणकालागि सिचाई कार्यालय र अन्य सरोकारवाला निकायसँग समन्वय गरी नियन्त्रणका कामहरू शुरु गरिने प्रदेश सभा सदस्य जनकलाल श्रेष्ठले बताउनु भएको छ ।
सांसद सहितको टोलीले विनयी त्रिवेणी ४ सर्दीमा रहेको होङ्सी सिमेण्टको समेत अवलोकन गरी यसको बारेमा जानकारी लिएको थियो ।