नवलपुरकाेे सिडियो पंगेनीद्वारा बाढी प्रभावित क्षेत्रको अनुगमन

चोरमारा । नवलपरासी (बर्दघाट सुस्ता पूर्व) जिल्लाको प्रमुख जिल्ला अधिकारी मनमाया पंगेनीले आज मध्यविन्दु नगरपालिका–८ मा गिरुवारी खोलाले पुर्याएको क्षतिको स्थलगत अनुगमन गर्नु भएको छ ।
गिरुवारी खोला पुलको उत्तर तर्फ खोलाले गरेको कटान क्षेत्रको उहाँले स्थलगत अनुगमन गर्नु भएको हो । खोलाले सो स्थानमा रहेको देवचुली कंक्रिट र आसपासका स्थानीयको जमिन कटान गरेको छ ।
कटानको अवस्था र क्षतिको विवरण संकलनको लागि प्रमुख जिल्ला अधिकारी पंगेनी सहितको टोलिले सो क्षेत्रको अनुगमन गरेको हो । उहाँसंगै सुरक्षा निकाय, स्थानीय तह, राजनितिक दलका प्रतिनिधिहरुको सहभागिता रहेको थियो ।
खेती योग्य जमिन र देवचुली कंक्रिट उद्योगको केही भौतिक संरचना खोलाले बगाएको टोलिमा सहभागि नेकपा नवलपुर कार्यालय सदस्य भिमलाल अधिकारीले जानकारी दिनुभयो ।
सो क्षेत्रका स्थानीय तारापति भट्टराईको दश कठ्ठा जमिनमा अहिले खोला बगेको छ । उहाँको दश कठ्ठा जमिन मध्ये ६ कठ्ठा जमिन यस अघिका वर्षहरुमा नै खोलाले कटान गरेको थियो । यसवर्ष बाँकी रहेको जमिन धानबाली सहित बाढीले कटान गरेको हो । उहाँको जमिन कटान गरेर खोलाले उहाँको भन्दा पछाडी साँध जोडिएका अमर सिं रोक्का र पूर्ण बहादुर खत्रीको तिन–तिन कठ्ठा जमिन समेत कटान गरेको अधिकारीले जानकारी दिनुभयो । उहाँहरु सहित अन्य स्थानीयहरुको समेत धानबालीलाई खोलाले नष्ट गरेको उहाँले बताउनुभयो ।
बुधबार र बिहिबार परेको अविरल वर्षाको कारण गिरुवारी खोलामा आएको बाढीले खोला तटीय क्षेत्रमा जमिन कटान सहित डुवान गरेको छ । शुक्रबार समेत प्रमुख जिल्ला अधिकारी पंगेनीले सो क्षेत्रको स्थलगत अनुगमन गर्नु भएको थियो । उहाँले शुक्रबार मध्यविन्दु– ६, ८ र १५ मा खोलाले पुर्याएको क्षतिको अनुगमन गर्नु भएको थियो । खोलाले मध्यविन्दु–८को रानीटार र मध्यविन्दु–७ तम्सरिया जोडेने निर्माणधिन झलुङ्गे पुलमा समेत क्षति पुर्याएको छ ।