कालीगण्डकी उपत्यकालाई शहरको रूपमा विकास गरौं : यूवा नेता गिरी

कावासोती । नेपाल कम्युनिस्ट पार्टीका यूवा नेता विद्रोही गिरीले कालीगण्डकी नदी किनारको उपत्यकालाई सुन्दर शहरको रूपमा विकास गर्नु पर्ने अवधारणा अघि सार्नुभएको छ । नवलपुरको कावासोतीमा नवलपुरको उद्यमशिलता, विकास र सम्भावना बिषयक बहस कार्यक्रममा उहाँले यस्तो अवधारणा अघि सार्नु भएको हो । सुन्दर नवलपुर हुनका लागि पहिलो सर्त सुन्दर बुलिङटार हुन जरूरी भएकाले नवलपुरको कालीगण्डकी तटिय क्षेत्रको दीगो विकास पहिलो हुनुपर्छ यूवा नेता गिरीले भन्नुभयो – “देवघाट देखि रामपुर चापकोट हुँदै राम्दी सम्मको कालीगण्डकी तटिय क्षेत्रलाई कालीगण्डकी उपत्यका घोषणा गरि यहाँका स्थानीय तहले एकीकृत रूपमा विकासको मोडेल शुरू गर्नु पर्छ ।”
नवलपुरको त्रिवेणी देखि पुर्व गैंडाकोट सम्म औद्योगिक क्षेत्रको रूपमा विकास हुँदै जाने भएकाले मानव शहरको रूपमा कालीगण्डकी उपत्यकाको बिकासमा लाग्नु पर्ने उहाँले जोडदिनुभयो । कालीगण्डकी नदी मात्र नभई सभ्यता समेत भएकाले यसको विकासमा नवलपुरका बुलिङटार, बौदीकाली गाउँपालिका , तनहुँका देवघाट, रिसिङ, घिरिङ गाउँपालिका , पाल्पा र स्याङ्जाका नदी तटका स्थानीय तहले अब नयाँ शहरको अवधारणालाई अगाडि बढाउनु पर्नेमा उहाँको जोड रहेकोछ ।
जनसंख्या , भौगौलिक अबस्था ऐतिहासिक धार्मिक एवम् सांस्कृतिक रूपमा यो ठाउँ महत्त्वपूर्ण रहेको छ ।
कृषि उर्वर भूमी, मनोरम फाँटहरू नदी र खोला नालाहरू प्रशस्त रहेकाले यहाँको प्राकृतिक सम्पदाको संरक्षण गर्दै विकासलाई अगाडि बढाउनु पर्छ युवा नेता गिरीले भन्नुभयो ।