बाहुवानमा झलुङ्गेपुल निर्माण सम्पन्न

चोरमारा । नवलपुरको विनयी त्रिवेणी गाउँपालिका–१ बाहुवान सिस्यानीमा झलुङ्गेपुल निर्माण भएपछि सो क्षेत्रका स्थानीय खुशी भएका छन् । विनयी खोलाको कारण वर्षेनी सास्ती खेप्दै आएका सो क्षेत्रका स्थानीयले अहिले विनयी खोलामा झलुङ्गेपुल निर्माण भएपछि खुशी भएका हुन् ।
विगतको वर्षमा आवतजावतको लागि खोला तर्नुपर्ने बाध्यता स्थानीयको थियो । जसको कारण वर्षेनी स्थानीयले ज्यान समेत गुमाउने गरेको स्थानीय धन बहादुर सोमैले बताउनुभयो । अब पुल बनेपनि दैनिक आवतजावतमा सुविधा पुग्ने उहाँको भनाईछ । विरामी हुदाँ उपचारको लागि जान समेत वर्षाको समयमा निकै समस्या हुने गरेको उहाँले बताउनुभयो ।
सो क्षेत्रका बालबालिकाहरु अध्ययनको लागि अरुणखोला लगाएतको स्थानमा घरभाडामा बस्नुपर्ने बाध्यता थियो । जसको कारण उनिहरुलाई निकै समस्या हुने गरेको हाल मध्यविन्दु–१ण् अरुणखोलाको जनता माध्यमिक विद्यालयको कक्षा ११ मा पढ्ने यानु ढेगा मगरले बताउनुभयो ।
केही समय अगाडी गण्डकी प्रदेशका भौतिक पूर्वधार बिकास मन्त्री रामशरण बस्नेत कोरोला त्रिवेणी सडकको अध्ययनको लागि सो क्षेत्र पुग्नेक्रममा स्थानीयहरुले त्यहाँको समस्या बताएका थिए । त्यसपस्चात गण्डकी प्रदेश सभा सदस्य जनकलाल श्रेष्ठको पहलमा मन्त्रालयले झलुङ्गेपुल निर्माणको लागि बजेट बिनियोजन गरेको थियो ।
२०७६ साउन २२ गते एक करोड ३७ लाख ८७ हजारमा ठेक्का सम्झौता भई निर्माण शुरु गरिएको पुल २०७७ साउन २२ गते निर्माण सम्पन्न गरिएको थियो । निर्माण सम्पन्न भएपछि सो क्षेत्रका एक सय ८१ परिवार लाभाम्वीत भएका छन् ।
पुलको सोमबार गण्डकी प्रदेश भौतिक पूर्वधार बिकास मन्त्री रामशरण बस्नेतले उद्घाट गर्नु भएको छ । उद्घाट गर्दै उहाँले सो क्षेत्रका स्थानीयले विगतमा आउदा माग गरे बमोजिमको पुल निर्माण सम्पन्न भई उद्घाटन गर्न आउन पाउदा निकै हर्सित भएको बताउनुभयो । त्रिवेणी नाका जोड्ने सडक निर्माणको लागि आवश्यक कामहरु भइरहेको भन्दै सो सडक निर्माण पछि बाहुवानको मुहार फेरीने बताउनुभयो ।