नवलपुरमा मतदान स्थल थप गरिने

कावासोती । जिल्ला निर्वाचन कार्यालय नवलपरासी पूर्वले निर्वाचनको प्रारम्भिक तयारीलई अगाडी बढाएको छ ।
कार्यलयले मतदान स्थल तथा मतदान केन्द्र पुनरावलोकन सम्बन्धि दुई वटा वैठक सम्पन्न गरेको छ । पुष २९ गते पहिलो वैठक बसेको थियो । भने, माघ ९ गते दोश्रो वैठक बसेर विभिन्न निर्णय समेत गरेको छ । जिल्ला निर्वाचन कार्यालयको आयोजनामा जिल्ला प्रशासन कार्यालय नवलपरासी पूर्वमा बसेको वैठकले जिल्लामा एउटा मतदान स्थल थप गर्ने र केहि मतदान स्थल सार्ने तथा केहिको नामावली सच्याउने निर्णय गरेको जिल्ला निर्वाचन कार्यालय नवलपरासी पूर्वका प्रमुख ओम नारायण शर्माले जानकारी दिनुभयो । मध्यविन्दु नगरपालिका १३ न. वडामा पर्ने कोटथर भन्ने स्थानका ३ सय ५० जना मतदाताहरु २५ किलोमिटर एकोहोरो यात्रा गरेर मत हाल्न दुवाकुन भन्ने ठाउँमा पुग्नुपर्ने बाध्यता रहेको कारण कोटथरमा रहको कालीका मन्दिर सामुदायिक भवन खोप केन्द्रमा एउटा मतदान स्थल थप गर्ने निर्णय गरिएको कार्यालय प्रमुख शर्माले बताउनुभयो । यसैगरि हुप्सेकोट गाउँपालिका ४ स्थित साविक गाविस भवनमा रहेको मतदान स्थललाई हुप्सेकोट गाउँपालिकामा सार्ने निर्णय भएको छ । साविकको गाविस भवनमा वडा कार्यालय स्थापना भएका कारण एक सय मिटरको दुरीमा रहेको गाउँपालिकाको भवनमा सार्ने निर्णय गरिएको छ । यस्तै मध्यविन्दु नगरपालिकामा पर्ने नारायणी स्वास्थ्य चौकीमा रहेको मतदान स्थलमा अहिले वडा कार्यालय स्थापना भएकाले नाम परिवर्तन गर्ने र जिल्लाका विभिन्न स्थानका साविकका केहि मतदान स्थलहरुको नाम परिवर्तन गर्नुपर्ने देखिएकाले ती नामलाई परिवर्तन गर्ने समेत निर्णय भएको उहाँले बताउनुभयो ।
प्रतिनिधिसभा विघटनसँगै सरकारले आगामी बैशाख १७ र २७ गते निर्वाचनको मिति घोषणा गरिसकेको छ । संसद विघटन मुद्धा सर्वोच्च अदालतमा विचाराधीन अवस्थामा रहँदै गर्दा निर्वाचन आयोगले मुलुकभर निर्वाचनको तयारी थालेको हो । जसअनुसार आयोगको निर्देशनमा जिल्ला निर्वाचन कार्यालय नवलपरासी पूर्वले पनि मतदानस्थल तथा मतदान केन्द्र पुनरावलोकन र मतदाता नामावली अद्यावधिक (दाबी विरोधसमेत) कार्यक्रम अगाडी बढाएको हो । मतदान स्थल तथा मतदान केन्द्र पुनरावलोकन सम्बन्धि पुष २९ गते पहिलो वैठक बसेको थियो । निर्वाचन कार्यालय , जिल्ला प्रशाशन कार्यालय , प्रदेश सभा सदस्य , जिल्लाका विभिन्न राजनैतिक दलका प्रतिनिधी , सुरक्षा निकायका प्रतिनिधी सहितको वैठकले माघ पाँच गतेभित्र आफ्नो राय सुझाव पेश गर्ने निर्णय भएको थियो । सोहि अनुसार पेश गरिएको राय सुझावमा माघ ९ गते बसेको वैठकबाट निर्णय गरिएको प्रमुख जिल्ला अधिकारी मनमाया पंगेनीले बताउनुभयो । वैठकमा यहाँका आठ वटा स्थानीय तहका जनप्रतिनिधी समेतको सहभागिता रहको थियो ।
यसैगरी मतदाता नामावली अध्यावधिक गर्ने कार्यका लागि जिल्लाका आठ वटै स्थानीय तहमा १ जना सहायक नाम दर्ता अधिकारी तोकीएको छ । उनीहरुलाई माघ ९ गते नै तालिम समेत प्रदान गरिसकिएको छ । यहि माघ माघ १६ र १७ गते जिल्लाको सबै स्थानीय तहका केन्द्रहरुमा मतदाता नामावलीको अद्यावधिक गर्ने कार्य हुने निर्वाचन कार्यालय प्रमुख शर्माले बताउनुभयो ।
सो अवधिमा मतदाता नामावलीमा रहेको सामान्य त्रुटी सच्चाउन निवेदन दिने, कसैको मतदाता नामावलीमा झुट्टा विवरण भए सोको विरोधमा उजुरी दिने, दुई वा दुई भन्दा बढी स्थानमा मतदाता नामावलीमा नाम भए एक स्थानमा मात्र कायम गर्न निवेदन दिने र मृत्यु भएका, नागरिकता त्याग गरेका, नागरिकता रद्द भएका तथा बसाई सराई गरी अन्यत्र गएका व्यक्तिको नाम मतदाता नामावलीबाट हटाउन निवेदन दिन सकिने उहाँले जानकारी दिनुभयो ।