छ महिनामा सवारी दुर्घटना: २३ जनाले ज्यान गुमाए

कावासोती ।नवलपरासी पूर्व ( नवलपुरमा ) चालु आर्थिक वर्षको ६ महिनाको अवधीमा सवारी दुर्घटनामा परि २३ जनाले ज्यान गुमाएका छन् ।
पछिल्लो ६ महिना साउनदेखि पुष मसान्तसम्ममा जिल्लामा भएको ८० सवारी दुर्घटनमा परि २३ जनाले ज्यान गुमाएका हुन । ज्यान गुमाउनेमा सबैभन्दा बढि पुरुष २१ जना छन् । भने, महिला एक जना र एक जना बालक हुन् ।
दुर्घटनामा परि गम्भिर घाईते हुनेमा ७८ जना छन् भने, सामान्य घाईते हुनेको संख्या ४७ रहेको जिल्ला ट्राफिक प्रहरी कार्यालय नवलपरासी पूर्वको तथ्याङ्कमा उल्लेख छ । गम्भिर घाईते हुनेमा सबैभन्दा बढि पुरुषको संख्या ५६ रहेको छ । महिलाको संख्या १४ र बालबालिकाको संख्या ८ रहेको छ । यस्तै सामान्य घाईते हुनेमा पुरुषको संख्या ३३ छ । महिलाको संख्या ६ र बालबालिकाको संख्या ८ रहेको छ ।

यहाँ हुने सवारी दुर्घटनामा सबैभन्दा बढि मोटरसाईकल दुर्घटनामा पर्ने गरेको जिल्ला ट्राफिक प्रहरी कार्यालय नवलपरासी पूर्वका प्रुमुख मुनेन्द्र थापाले जानकारी दिनुभयो । नवलपुर गण्डकी प्रदेशकै अत्याधिक दुर्घटना हुने जिल्ला मध्ये पर्दछ । नवलपुरमा बढि दुर्घटना हुनुको मुख्य कारण सडकको अवस्था रहेको जिल्ला कार्यालय प्रमुख थापा बताउनुहुन्छ । नवलपुर क्षेत्रमा ७७ किलोमिटर लामो राजमार्ग पर्दछ । राजमार्ग लामो दुरीको भएकाले पनि यहाँ बढि दुर्घटना हुने गरेको छ भने, दाउन्नेको उकालो ओरालो र साँघुरो बाटोले गर्दा पनि यस क्षेत्रमा अत्याधिक दुर्घटना हुने गरेको उहाँ बताउनुहुन्छ । यस्तै दाउन्नेमा धेरैजसो मालवहाक ट्रक दुर्घटना हुने गरेका छन् । ट्रक उकालो चढ्ने तर ओरालोमा लोडका कारण ब्रेक फेल भएर बढि दुर्घटना हुने गरेको पाईएको थापाकोे भनाई छ ।
मोटरसाईकल र बसले पनी घुम्तीमा ओभरट्याक गर्न खोज्दा बढि दुर्घटना हुने गरेको उहाँ बताउनुहुन्छ । दुर्घटनाग्रस्त क्षेत्र भनेर स्पष्ट बोर्ड हुँदा समेत चालकले लापरवाहि तरिकाले सवारी चलाउदा नै बढि दुर्घटना हुने गरेको उहाँको भनाई छ ।