कावासाेतिकाे स्वास्थ्य चौकी भवन अन्तिम चरणमा

कावासोती  । कावासोती नगरपालिका १२ मा रहेको पिठौली स्वास्थ्य चौकीको भवन निर्माण अन्तिम चरणमा पुगेको छ ।
एम्बुलेन्सको आम्दानीबाट खरीद गरिएको ६ कठ्ठा जग्गामा स्वास्थ चौकीको भवन निर्माण गरिएको छ । स्थानीय समाजसेवि हरिलाल प्रधानको सहयोगबाट पिठौलीमा सञ्चालन गरिएको सन्तुदेवी प्राथमिक स्वास्थ्य केन्द्रमार्फत् सञ्चालन गरिएको एम्बुलेन्सबाट भएको आम्दानीलाई बचत गरेर स्वास्थ्य चौकीका लागि २० लाख रुपैयाँको जग्गा खरीद गएको थियो । सोहि जग्गामा अहिले स्वास्थ्य चौकीको भवन निर्माण भएको वडा नम्बर १२ का अध्यक्ष खेम प्रसाद काफ्लेले जानकारी दिनुभयो । स्वास्थ्य मन्त्रालयबाट प्राप्त ३ करोड रुपैयाँ बजेटबाट निर्माण गरिएको दुईतले उक्त भवन आउदो फागुनभित्र निर्माण सम्पन्न गर्ने काफ्लेले बताउनुभयो ।
कावासोती ११ , १२ र १३ का बासिन्दालाई सामान्य स्वास्थ्य उपचारका लागि पनि दुम्कौली वा मध्यविन्दु जिल्ला अस्पताल पुग्नुपर्ने बाध्यता रहेको छ । जहाँ पुग्न यहाँका बासिन्दालाई पायक पर्दैन् । अहिले सञ्चालनमा रहेको स्वास्थ्य चौकी सानो र जिर्ण समेत भएकाले स्वास्थ्य सेवा दिन पनि समस्या भईरहेको छ । जसलाई मध्यनजर गरि यहाँका जनप्रतिनिधी तथा सरोकारवालाहरुको पहलमा स्वास्थ्य चौकी भवन निर्माण भएको हो ।
स्वास्थ्य चौकी भवन निर्माण सम्पन्न भएपछि अन्य स्वास्थ्य सेवा थप गर्ने योजना रहेको स्वास्थ्य चौकीका प्रमुख ईन्द्र महतोले बताउनुभयो । बर्थिङ्ग सेन्टर र हप्तामा एक पटक विशेषज्ञ सेवा समेत प्रदान गर्ने योजना रहेकाले स्वास्थ्य संस्था सञ्चालन तथा व्यवस्थापन समितीसंग समन्वय गरेर काम गर्ने सोँच बनाएको उहाँले बताउनुभयो । ‘कावासोतीको यो ग्रामिण क्षेत्र हो । यहाँ विपन्न र पछाडी परेका समुदायको बाहुल्यता छ । सुत्केरी हुनका लागि नजिक पायक पर्ने स्वास्थ्य संस्था छैन । प्राईभेटमा जान सक्दैनन् त्यसैले बर्थिङ्ग सेन्टरको खाँचो छ । ’ महतोले भन्नुभयो ।
कावासोतीमा १५ शैश्याको नगर अस्पताल बनाउने कुरा समेत अघि बढेको छ । बजार क्षेत्र भन्दा ग्रामिण क्षेत्रमा अस्पतालको खाँचो रहेकाले पिठौली स्वास्थ्य चौकीलाई स्तर उन्नती गर्ने योजनामा आफु रहेको कावासोती नगरपालिका प्रमुख चन्द्र कुमारी पुनले बताउनुभयो । तर , आवश्यक छलफल र परामर्श गर्न बाँकी रहको उहाँले बताउनुभयो ।