नवलपुरबाट यस वर्ष ६ हजार आठ सय बढी विद्यार्थी एसईई परिक्षामा सहभागी हुने

तिर्थराज डुम्रे,चोरमारा । दुई वर्ष पछि सञ्चालन हुन लागेको माध्यामिक शिक्षा परिक्षा (एसईई) मा नवलपरासी पूर्व नवलपुरबाट ६ हजार आठ सय सात जना विद्यार्थी सहभागी हुने भएका छन् । कोभिड–१९ संक्रमणको कारण विगतको दुई वर्ष विद्यार्थीहरुको आन्तरिक मुल्यांकन गरिएको थियो ।

२०७९ बैशाख ९ गते देखि शुरु हुने परिक्षामा जिल्लाबाट तिन हजार चार सय ६२ जना छात्रा सहित ६ हजार आठ सय सात जना विद्यार्थी परिक्षामा सहभागी हुने शिक्षा विकास तथा समन्वय ईकाइ नवलपुरका प्रमुख कृष्णचन्द्र पोखरेलले बताउनुभयो ।

नवलपुरमा सबै भन्दा बढी कावासोती नगरपालिकाबाट सात सय २० जना छात्रा सहित एक हजार पाँच सय ३० जना विद्यार्थीहरु एसईई परिक्षामा सहभागी हुदैछन् । यस्तै जिल्लाको मध्यविन्दु नगरपालिकाबाट पाँच सय ५७ जना छात्रा सहित एक हजार एक सय २९ जना, देवचुली नगरपालिकाबाट पाँच सय तिन जना छात्रा सहित एक हजार ६२ जना, गैंडाकोट नगरपालिकाबाट ६ सय ६२ जना छात्रा सहित एक हजार तिन सय ८० जना, हुप्सेकोट गाउँपालिकाबाट दुई सय ४५ जना छात्रा सहित चार सय २९ जना, विनयी त्रिवेणी गाउँपालिकाबाट तिन सय ९३ जना छात्रा सहित सात सय ८३ जना, बौदीकाली गाउँपालिकाबाट एक सय १५ जना छात्रा सहित दुई सय २५ जना र बुलिङ्गटार गाउँपालिकाबाट एक सय ५० जना छात्रा सहित दुई सय ६९ जना विद्यार्थी एसईई परिक्षामा सहभागी हुनेछन् ।

नवलपुरमा एसईई परिक्षा सञ्चालनको लागि २५ वटा परिक्षा केन्द्र तोकिएको छ ।

यस अघि कोभिड–१९ को संक्रमणको कारण विद्यालयहरुलाई विद्यार्थीको आन्तरिक मुल्यांकन गर्ने जिम्मेवारी दिइएको थियो । सो समयमा विद्यार्थीहरुले प्राप्त गरेको अंक र नतिजा माथि विभिन्न टिप्पणीहरु भएका थिए ।