स्वास्थ्यको अधिकार सम्बन्धमा अन्तरक्रिया कार्यक्रम सम्पन्न

कावासोती । अनौपचारिक क्षेत्र सेवा केन्द्र (इन्सेक)को आयोजनामा विनयी त्रिवेणी गाउँपालिकामा स्वास्थ्यको अधिकार सम्बन्धि अन्तरक्रिया कार्यक्रम मंगलबार सम्पन्न भएको छ ।

स्थानीय समुदायलाई सचेत पार्दै जिम्मेवार निकायलाई जवाफदेही बनाउन पहल कार्यक्रम (इएलपी) अन्तर्गत आयोजना भएको कार्यक्रममा सहभागीहरुले स्थानीय स्वास्थ्य चौकीहरुमा नेपाल सरकारले उपलब्ध गराउने निशुल्क औषधीको नियमित उपलब्धता नभएको बताउनु भएको थियो ।

गाउँपालिकाले सबै वडामा स्वास्थ्य सेवाको पहुँच स्थापित गरेको भएपनि निशुल्क उपलब्ध हुनुपर्ने औषधिको उपलब्धता, स्वास्थ्यकर्मीले प्रदान गर्ने सेवाको बारेमा जिज्ञासा राख्नु भएको थियो ।

कार्यक्रममा प्रम्ख अतिथि विनयी त्रिवेणी गाउँपालिकाका उपाध्यक्ष मिनाकुमारी रानाले गाउँपालिकाले सबै क्षेत्रका नागरिकलाई स्वास्थ्य सेवा प्रवाह गर्ने सदैव पालिका प्रतिबद्ध रहेको बताउनुभयो । विगतको स्वास्थ्य संस्था र हाल प्रत्येक वडा तथा पायक पर्ने स्थानमा स्थापना भएका स्वास्थ्य ईकाई मार्फत सेवा सञ्चालनले स्थानीयलाई सहजता ल्याएको बताउनुभयो ।

विनयी त्रिवेणी गाउँपालिका वडा नं. ७ का वडा अध्यक्ष गोपाल बहादु क्षेत्रीले आवश्यकता अनुसार औषधिको व्यवस्थापनमा स्वास्थ्य चौकी लागि परेको बताउनुभयो । स्वास्थ्य चौकीबाट प्रवाह हुने सेवामा बिस्वस्त हुन उहाँले स्थानीय सेवाग्राहीलाई अनुरोध गर्नुभयो ।
कार्यक्रममा स्थानीयले निशुल्क रुपमा प्राप्त हुने औषधीको बारेमा आम उपभोक्ताहरुलाई आवश्यक जानकारी समेत नरहेको बताउनु भएको थियो ।
कार्यक्रममा इन्सेक नवलपुरका जिल्ला प्रतिनिधि तिर्थराज डुम्रेले यहाँ पहिचान भएका सवालहरु पलिका र सम्बन्धित निकायमा ध्यानाकर्षण गराउने बताउनुभयो ।