नवलपुरमा टाइफाइड विरुद्धको खोप अभियान चैत्र महिनामै सम्पन्न हुने

खगेन्द्र पराजुली
नवलपुर । नवलपुरमा टाइफाइड विरुद्धको खोप अभियान तथा नियमित खोपमा टाइफाइड खोपको सुरुवात अभिमुखीकरण सम्पन्न भएको छ । स्वास्थ्य कार्यालय नवलपुरले आठै पालिकाका स्वास्थ्य शाखा र पालिका स्तरीय स्वास्थ्य संस्थाका प्रमुख एवम् उपप्रमुख लक्षित खोप सम्बन्धी अभिमुखीकरण तथा योजना गोष्ठी सम्पन्न गरेको हो ।
नेपालमा बिरामी हुने तेस्रो कारण र अस्पताल भर्ना हुने चौथो स्थानका रुपमा रहेको टाइफाइड रोग भाइरस संक्रमणका कारण हुने रोग भएकाले सरकारले देशैभर नियन्त्रण गर्न थालेको अभियान अन्तर्गत नवलपुरमा चैत्र २४ गते देखि सुरु गरेर चैत्र मसान्तभित्र सम्पन्न गर्ने गरि पूर्व तयारी भएको जनाईएको छ ।
१५ महिनादेखि १५ बर्ष मुनिका बालबालिकालाई विद्यालयमा खोप केन्द्र शिविर बनाएर खोप लगाइने तयारी छ । बिद्यालय नजाने उमेरका बालबालिकालाई समेत स्थानीय स्वास्थ्य शाखाले तोेकेको खोप केन्द्र अर्थात पायक पर्ने विद्यालयमा तोकिएको समयमा पुर्याएर खोप लगाउन स्वास्थ्य प्रमुख केशवप्रसाद चापागाइले आग्रह गर्नुभयो ।
विश्व स्वास्थ्य संगठनले सिफारीस गरेको टाइफाइड कन्जेकेट भ्याक्सिन जिल्लाका करिव ८० हजारदेखि ८५ हजार बालबालिकालाई दिईने कार्यालय प्रमुख चापागाइले जानकारी दिनुभयो ।
विद्यालय परिसरबाट सेवा प्रवाह गरिने भएकाले सम्बन्धीत पालिकाको स्वास्थ्य शाखाले बिद्यालयका प्रधानाध्यापक र खोप केन्द्र विद्यालयका एक शिक्षिका समेतलाई अभिमुखीकरणमा समावेश गराएर प्रभावकारी सेवा सञ्चालन गरिने समेत जनाईएको छ ।
सामान्य बिरामी परेका वा औषधि सेवन गरेका बालबालिकालाई खोप दिन मिल्ने भएता पनि अति ज्वरो वा दिर्घ प्रकृतिका रोगी बालबालिकालाई खोप केन्द्रमा खटिएका स्वास्थ्यकर्मीको परामर्श लिन समेत स्वास्थ्य प्रमुख चापागाइले आग्रह गरेका छन् ।
यसपटक देशैभर अभियानका रुपमा थालिएको टाइफाइड विरुद्धको खोप आउँदो जेठदेखि १५ महिना उमेरका बालबालिकालाई नियमित रुपमा दादुरा–रुवेला विरुद्धको नियमित खोप साथमै लगाईनेछ । अन्य खोपले जस्तै सामान्य रिगँटा लाग्ने वा सामान्य ज्वरो आउने सक्ने भएपनि खोपको अन्य साईड ईफेक्ट नरहेको स्वास्थ्य प्रमुख चापागाइले बताएका छन् ।