को बन्छ विनयी त्रिवेणी गाउँपालिकाको अध्यक्ष ,यस्ता छन् आकांक्षी

एमालेबाट पाँच जनाको दावेदारी
बैशाख ३० मा हुने निर्वाचनको लागि अहिले नेकपा एमाले विनयी त्रिवेणीमा छलफलको चरणमा रहेको नेताहरुले बताएका छन् । गत निर्वाचनमा देखिएको आन्तरिक विवादको अन्त्य र सम्भाव्य गठबन्धनको विरुद्ध बलियो उम्मेदवार चयनलाई एमाले विनयी त्रिवेणीले रणनीतिक योजना निर्माण गरिरहेको एमाले नेताहरु बताउछन् ।
विनयी त्रिवेणी गाउँपालिकामा गत निर्वाचनमा एमालेबाट उम्मेदवार बनेका लक्ष्मण पाण्डे सहित पाँच जना यस पटकको निर्वाचनमो आकांक्षी उम्मेदवार रहेका छन् । आकांक्षी उम्मेदवारमा पार्टी गाउँपालिका अध्यक्ष घनश्याम गिरी, उपाध्यक्ष प्रेम जि.सी., वडा नं. ३ का निर्वाचित वडा अध्यक्ष टुक बहादुर बैदवार आकांक्षी उम्मेदवार हुनुहुन्छ । पार्टी गण्डकी प्रदेश सदस्य कृष्ण बि.क. लाई समेत एमालेबाट पालिका प्रमुखको दावेदारको रुपमा लिएको छ ।
गत स्थानीय तह निर्वाचनमा पालिकाको ७ वटा वडा मध्य एक वटामा मात्रै एमाले विजयी भएको थियो । तसर्थ पनि यस पटकको निर्वाचनमा एकमतका साथ होमिनु पर्ने दवाव एमाले नेतृत्वलाई छ । आकांक्षी उम्मेदवारहरुले आफ्नो उम्मेदवारी पार्टी नेतृत्वमा राखेको बताउदै पार्टी नेतृत्वले दिने जिम्मेवारी बहन गर्न तयार रहेको बताए छन् ।

कांग्रेसमा आठ जना आकांक्षी
गत निर्वाचनमा विजयी भएको कांग्रेसबाट हालका गाउँपालिका अध्यक्ष डम्बर बहादुर जि.सी., उपाध्यक्ष मिना कुमारी राना सहित निर्वाचित वडा अध्यक्ष लगायतका व्यक्तिहरुले पालिका अध्यक्षमा दावेदारी प्रस्तुत गरेका छन् । कांग्रेसबाट गाउँपालिका अध्यक्षमा नेपाली कांग्रेस विनयी त्रिवेणीका पार्टी सभापति एवम् वडा नं. १ का वडा अध्यक्ष अजित कुमार थापा, कांग्रेस महाधिवेशन प्रतिनिधि एवम् वडा नं. २ का वडा अध्यक्ष बिष्णु ढकाल, वडा नं. ४ का वडा अध्यक्ष गोपाल प्रसाद अधिकारी, वडा नं. ५ का वडा अध्यक्ष रन बहादुर झेडीले समेत आकांक्षा प्रस्तुत गर्नु भएको छ । यस्तै स्थानीय भानुदय क्याम्पस प्रमुख बालकृष्ण भुसालले समेत आफ्नो उम्मेदवारी प्रस्तुत गर्नु भएको छ । कांग्रेस गाउँपालिका उपसभापति एक प्रसाद श्रेष्ठले समेत पालिका सभापतिको लागि आफ्नो आकांक्षा नेतृत्व समक्ष राख्नु भएको छ ।
गाउँपालिकाका अध्यक्ष डम्बर बहादुर जि.सी.ले यस पटक गाउँपालिका अध्यक्षमा आफ्नो उम्मेदवारी रहने बताउनुभयो । पार्टी नेतृत्व र कार्यकर्ताको भावनालाई सम्मान गर्ने भन्दै उहाँले पाँच वर्षको कार्यकालको अनुभवलाई अझ व्यवस्थित र समृद्ध विनयी त्रिवेणी निर्माणको लागि आफ्नो उम्मेदवारी रहने बताउनुभयो ।
गाउँपालिका उपाध्यक्ष मिना कुमारी रानाले पाँच वर्ष गाउँपालिका उपाध्यक्षको रुपमा कार्य अनुभवलाई पालिका प्रमुखको रुपमा प्रयोग गर्न आफुले नेतृत्व समक्ष उम्मेदवारी प्रस्तुत गर्ने बताउनुभयो । पार्टी नेतृत्वले दिने जिम्मेवारी आफुले स्वीकार गर्ने रानाले बताउनुभयो ।
कांग्रेस विनयी त्रिवेणी गाउँपालिकाका सभापति अजित कुमार थापाले दुई कार्यकाल गाउँपालिकामा पार्टी सभापति र निर्वाचित वडा अध्यक्ष रुपमा पार्टी राजनिति र आम जनता  पुर्याएको योगदानलाई पार्टीले सहि मुल्यांकन गर्ने बताउनुभयो । वडा नं २ का वडा अध्यक्ष बिष्णु ढकालले गाउँपालिका अध्यक्षको लागि पार्टी नेतृत्वसंग आफ्नो उम्मेदवारी प्रस्तुत गरेको बताउनु भएको छ ।
आकांक्षी उम्मेदवारहरु गोपाल अधिकारी, रन बहादुर झेडी, बालकृष्ण भुसाल, एक प्रसाद श्रेष्ठले आफ्नो दावेदारी पार्टी नेतृत्वमा राख्दै आउनु भएको छ ।
कांग्रेस वृत्तमा कांग्रेस महासमिति सदस्य गणेशमान श्रेष्ठलाई पालिकाको अध्यक्ष पदमा मुख्य दावेदारको रुपमा चर्चा छ । यस अगाडी गण्डकी प्रदेश सभा सदस्य पदमा उम्मेदवार दिनु भएका उहाँलाई पछिल्लो समय आएको पार्टी मापदण्डले उम्मेदवारको रुपमा सिफारिस हुन सक्नुहुन्न । कांग्रेसले उम्मेदवार सिफारिस गर्दा माथिल्लो तहका निर्वाचनमा उठेका व्यक्तिहरुको नाम सिफारिस नगर्न सर्कुलर गरेको थियो ।

अन्य दल गठबन्धनको आशमा 
सत्ता गठबन्धनको बीच हुने चुनावी तालमेल अनुसार आफ्नो उम्मेदवार चयन गर्ने योजनामा माओवादी केन्द्र सहितका दलहरु रहेका छन् । तथापी पार्टीको तर्फबाट आफ्नो उम्मेदवार चयनको लागि तयारी गरिरहेको माओवादी केन्द्रका गाउँपालिका अध्यक्ष कृष्ण पाण्डेले बताउनुभयो । गठबन्धन हुदाँ र नहुदा दुवै आवस्थामा आफ्नो उम्मेदवारी हुने पाण्डेले बताउनुभयो । उहाँ गत स्थानीय तह निर्वाचनमा माओवादी केन्द्रबाट गाउँपालिका अध्यक्षको उम्मेदवार समेत हुनुहुन्थ्यो । गठबन्धन बनाएर चुनावमा जाने योजना सहित एक चरणको वार्ता गाउँपालिका स्तरमा भएको उहाँले जानकारी दिनुभयो ।
एकिकृत समाजवादी पार्टीबाट पालिका अध्यक्षको लागि लक्ष्मण बहादुर पाण्डे, तारा बिक र प्रेम बि.क. आकांक्षी उम्मेदवार भएपनि सम्भाव्य गठबन्धनलाई ध्यानमा राख्दै अन्य उम्मेदवारी घोषणा लगायतको कार्य भने गरि नसकेको पार्टी गाउँपालिका अध्यक्ष प्रेम बि.क.ले बताउनुभयो ।
सत्ता गठबन्धनमा रहेको जनता समाजवादी पार्टीबाट संघिय परिषद् सदस्य तौ गुरुङ पालिका अध्यक्षको दावेदार हुनुहुन्छ ।
सत्ता गठबन्धनमा रहेका कांग्रेस बाहेकका दलहरुले गठबन्धनको लागि आन्तरिक गृहकार्य र कांग्रेस नेतृत्वलाई गठबन्धनको लागि पालिका स्तरमा दवाव समेत सृजना दिदै आएका छन् ।
राप्रपा वडा केन्द्रीत 
राप्रपाबाट विनयी त्रिवेणी गाउँपालिकाले यस पटकको स्थानीय तह निर्वाचनमा गाउँपालिका अध्यक्ष, उपाध्यक्ष सहित सवै पदहरुमा उम्मेदवार उठाउने गरी तयारी गरिरहेको छ । सबै वडामा अध्यक्ष सहित पाँचै जना उम्मेदवार उठाउने योजना सहित अहिले आन्तरिक गृहकार्य भइरहेको राप्रपा विनयी त्रिवेणीका वडा अध्यक्ष तिलक भट्टराईले बताउनुभयो । केही वडामा उम्मेदवार छनोट समेत भएको बताउदै उहाँले राप्रपाले सम्भाव्य चुनावी तालमेललाई समेत ध्यानमा राखेको बताउनुभयो । पार्टीबाट पालिका अध्यक्षको दावेदारमा तिलक भट्टराई रहनु भएको छ ।