अब पेट्रोल पम्पमा विद्युतीय गाडी चार्ज स्टेशन अनिवार्य गरिँदै

ऊर्जा, जलस्रोत तथा सिंचाइ मन्त्रालयले विद्युत खपत वृद्धि तथा खनिज इन्धन न्यूनीकरणसम्बन्धी कार्ययोजनामार्फत नयाँ र नमुना पेट्रोल पम्पमा अनिवार्य चार्जिङ स्टेसन राख्नुपर्ने व्यवस्था गर्न लागेको हो । उक्त कार्ययोजनामा पुराना पम्पलाई पनि नवीकरणको बेला सम्भव भएसम्म चार्जिङ स्टेसन राख्न लगाउने व्यवस्था रहेको आयल निगमका प्रवक्ता मनोजकुमार ठाकुरले बताए । उनका अनुसार मन्त्रिपरिषद्ले स्वीकृत गरेपछि उक्त कार्ययोजना कार्यान्वयनमा आउनेछ ।

नेपालमा सानाठूला गरेर करिब १० हजार विद्युतीय गाडी छन् । निजी क्षेत्रले बनाएको ८०, नेपाल विद्युत प्राधिकरणले बनाएको ५१ र सिंहदरबारभित्र ५ गरी १३६ वटामात्रै चार्जिङ स्टेसन रहेका छन् । प्राधिकरणले १४ वटा थप चार्जिङ स्टेसन निर्माण गरिरहेको छ ।