नवलपुरमा नेचर गाइड तालिम समापन : २१ दिने तालिमबाट ४१ जना प्रशिक्षित

कावासोती । उद्योग तथा पर्यटन मन्त्रालय, गण्डकी प्रदेशको आयोजनामा आयोजित २१ दिने नेचर गाइड तालिम शनिबार सम्पन्न भएको छ। बैशाख २१ गतेदेखि सुरु भएको तालिममा नवलपुर जिल्लाका विभिन्न स्थानका ४१ जनाले सहभागिता जनाएका थिए । समापन कार्यक्रमको  अध्यक्षता मन्त्रालयका सचिव इन्द्र प्रसाद वस्यालले गरेका थिए भने प्रमुख अतिथिका रूपमा जिल्ला समन्वय समिति, नवलपुरका प्रमुख बाबुराम बिश्वकर्मा उपस्थित रहेको थियो । साथै कावासोती नगरपालिकाका प्रमुख प्रशासकीय अधिकृत लिलाराज पौडेल र देवचुली नगरपालिकाका प्रमुख प्रशासकीय अधिकृत अशोक कोइरालाको समेत उपस्थिति रहेको थियो। सचिव वस्यालले सीमित स्रोत साधनमा धेरै संख्यामा तालिम प्रदान गर्न सफल भएकोमा खुसी व्यक्त गरे । उनले विशेष गरी स्थानीय जनजाति समुदायका व्यक्तिहरूले तालिममा सहभागीता जनाएकोमा बधाई समेत दिए । वस्यालले यस क्षेत्रको पर्यटन विकासको लागी गुरूयोजना बनाएर नै दीर्घकालीन पर्यटन विकासतर्फ अघि बढ्नुपर्ने आवश्यकता औंल्याए । यस तालिमले स्थानीय पर्यटन व्यवसायीहरूलाई सशक्त बनाउनेमा उनले विश्वास व्यक्त गरे ।तालिम समापन कार्यक्रममा जिल्ला समन्वय समिति, नवलपुरका प्रमुख बाबुराम बिश्वकर्माले नवलपुर जिल्ला जैविक, भौगोलिक र सांस्कृतिक विविधताको दृष्टिले नेपालको एक विशेष क्षेत्र भएको बताए । चितवन राष्ट्रिय निकुञ्ज, सामुदायिक बन क्षेत्रहरू, विविध जातजाति र संस्कृतिको संगम भएको यो जिल्लाले आन्तरिक तथा बाह्य पर्यटकहरूलाई आकर्षित हुने गरेको भन्दै यस्ता सम्पदाहरूको संरक्षण गर्दै त्यसको लाभ स्थानीय जनताले पाउन दक्ष जनशक्ति अत्यावश्यक रहेको बताए । नेचर गाईड बन्ने तालिम त्यसैको एउटा महत्वपूर्ण प्रयास हो। उनले भनेःयो केवल जंगलको बाटो देखाउने कुरा होइन; यो त वातावरण, वन्यजन्तु, संस्कृति र मानव सभ्यताको सन्तुलन बुझ्ने र अरूलाई पनि बुझाउने जिम्मेवारी हो। त्यस्तै कावासोती नगरपालिकाको प्रमुख प्रशासकिय अधिकृत लिलाराज पौडेलले यस क्षेत्र जैविक विविधता, सांस्कृतिक सम्पदा र पर्यटकीय सम्भावनाले भरिपूर्ण भएको बताउदैं यी सम्भावनालाई संरक्षण गर्दै स्थानीय जनतालाई रोजगारीमा रूपान्तरण गर्न यस्ता तालिमहरू अत्यन्त महत्वपूर्ण हुने बताए ।

त्यस्तै देवचुली नगरपालिकाको प्रमुख प्रशासकिय अधिकृत अशोक कोईरलाले नवलपुरको भौगोलिक विविधता, धार्मिक स्थलहरू, वन्यजन्तुको बसोबास, र सामुदायिक बनहरूको योगदान अत्यन्त महत्वपूर्ण छ। यी सम्पदाहरूको संरक्षण गर्दै त्यसको उपयोगबाट रोजगारी सिर्जना गर्न सकिने बताए । उनले भने : यस तालिममा सहभागी भई यहाँका युवाहरूले आफूभित्रको क्षमतालाई अझ निखार्ने अवसर पाएका छन्। नेचर गाईड पेशा मात्र होइन, यो सेवा हो ।

कार्यक्रममा होमस्टे महासंघका अध्यक्ष प्रेमशंकर मर्दिनियाले “नवलपुरमा १०० जना भन्दा बढी नेचर गाइडहरू छन्, र यहाँको पर्यटकीय सम्भावना चितवन जिल्लाको भन्दा पनि धेरै रहेको बताए । यस क्षेत्रको विकासको लागी सबै क्षेत्रबाट सहयोग आवश्यक रहेको बताए । सहभागीहरूलाई पर्यटन क्षेत्रमा रोजगारी तथा व्यवसायिक अवसरहरू बढाउने लक्ष्य लिइएको आयोजक संस्थाले जनाएको छ । तालिममा ताल परियोजना ,कावासोती नगरपालिका लगायतको संस्थाहरुको सहयोग रहेको थियो ।