पुस महिनामा गण्डकीमा सवारी दुर्घटनाबाट १९ जनाको मृत्यु

पोखरा । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय गण्डकीले पुस महिनाको प्रगति विवरण सार्वजनिक गरेको छ । कार्यालयका अनुसार पुस महिनामा गण्डकी प्रदेशका विभिन्न स्थानमा भएका ५३ वटा सवारी दुर्घटनामा परी १९ जनाले ज्यान गुमाएका छन् । मृत्यु हुनेमा १६ जना पुरुष, १ जना महिला, १ जना बालक र १ जना बालिका रहेका छन् । दुर्घटनामा परी ५२ जना घाइते भएकोमा ४१ जनाको अवस्था गम्भीर रहेको सूचना अधिकारी एवं प्रहरी नायव उपरीक्षक गोपी कृष्ण सुवेदीले जानकारी दिए । घाइते हुनेमा ३६ जना पुरुष, १० जना महिला, २ जना बालक र ४ जना बालिका छन् । ट्राफिक प्रहरीले दुर्घटनामा परेका ५३ जनाको उद्धार गरेको विवरणमा उल्लेख छ । सवारी दुर्घटनाको कारण विश्लेषण गर्दा सबैभन्दा बढी चालकको लापर्बाही देखिएको छ । ४७ वटा दुर्घटना चालकको कारणले भएका छन्, जसमा तीव्र गतिका कारण ३०, मादक पदार्थ सेवन (मापसे) का कारण ८, चालकको असक्षमताका कारण ३, ओभरटेक गर्दा २ र लेन अनुशासन उल्लंघनका कारण १ दुर्घटना भएका छन् । त्यस्तै सवारी साधनको अवस्थाका कारण १, सडक प्रयोगकर्ताको कारण २, यात्रुको कारण २ र सडकको अवस्थाका कारण १ दुर्घटना भएको कार्यालयले जनाएको छ । पुस महिनामा ट्राफिक प्रहरीले ३ हजार १७३ वटा सवारी साधनको चेकजाँच गरेको थियो भने भूपि शेरचन र पृथ्वी राजमार्गमा ३ पटक राजमार्ग गस्ती गरिएको थियो । ट्राफिक व्यवस्थापन र दुर्घटना न्यूनीकरणका लागि महिनाभर १ हजार ८०६ पटक ट्राफिक प्रहरी परिचालन गरिएको विवरणमा उल्लेख छ ।ट्राफिक नियम उल्लंघन गर्ने सवारी साधनहरूमाथि गरिएको कारबाहीबाट १ करोड ९ लाख ७ हजार ५०० रुपैयाँ राजस्व संकलन भएको छ । पुस महिनामा १२ हजार १६१ वटा सवारी साधनलाई कारबाही गरिएको सुवेदीले बताए । यसैगरी स्वरूप परिवर्तन गर्ने र चर्को आवाज निकाल्ने ३० वटा मोटरसाइकललाई नियन्त्रणमा लिई थप कारबाहीका लागि यातायात व्यवस्था कार्यालय पठाइएको छ, जसबाट २ लाख ७३ हजार १४३ रुपैयाँ राजस्व संकलन भएको छ । लामो तथा छोटो दूरीका सवारी चालकहरूको चेकजाँचका क्रममा ३१ जनामध्ये स्याङ्जाबाट १ र तनहुँबाट १ गरी २ जना चालकले लागुपदार्थ सेवन (लापसे) गरेको भेटिएपछि उनीहरूलाई आवश्यक कारबाहीका लागि सम्बन्धित जिल्ला प्रहरी कार्यालयमा बुझाइएको छ ।

समुदाय तथा विद्यालय केन्द्रित कार्यक्रम अन्तर्गत ट्राफिक प्रहरीले २ हजार ५७३ पटक विभिन्न सचेतना कार्यक्रम सञ्चालन गरेको छ । यसबाट ९० हजार ४६ जना लाभान्वित भएका छन् । जसमा विद्यालय तथा कलेजका विद्यार्थी, नयाँ चालक, व्यवसायी र पैदलयात्रीहरू रहेका छन् । प्रहरी कार्यालयको हटलाइन तथा डिउटी अधिकृतको नम्बरमा ३ हजार ९५९ वटा कल आएको र ती सबैको सम्बोधन गरिएको कार्यालयले जनाएको छ । सेवाग्राहीहरूको कागजात, दुर्घटना सिफारिस लगायतका काममा १२ हजार १६१ जनाले सेवा लिएका छन् । प्रहरी कर्मचारीहरूको मनोबल बढाउन साप्ताहिक रूपमा ‘टी विथ द टिम’ र तनाव व्यवस्थापनका लागि ‘नेचर वाक’ कार्यक्रम समेत सञ्चालन गरिएको विवरणमा उल्लेख छ ।

ट्राफिक प्रहरीले विभिन्न सिर्जनात्मक र प्रवर्धनात्मक कार्यहरू समेत गरेको छ । नवलपरासी पूर्वमा ‘हिट एन्ड रन’ (ठक्कर दिएर फरार हुने) घटनामा संलग्न ३ वटा सवारी साधन र चालकलाई नियन्त्रणमा लिई कारबाही अगाडि बढाइएको छ । लमजुङको सुन्दरबजार ७ पाउँदीमा ‘बढी दुर्घटना सम्भावित क्षेत्र’ लेखिएका सूचनामूलक ट्राफिक संकेत बोर्ड राखिएको छ । शीतलहरका कारण सडक चिप्लो हुने र कुहिरोले दृश्यता कम हुने समयमा सुरक्षित यात्राका लागि नवलपरासी पूर्वको दाउन्ने खण्डमा विशेष सचेतना र ४५० थान पर्चा पम्पलेट वितरण गरिएको छ । पोखराका विभिन्न स्थानमा ५१ थान ट्राफिक संकेत बोर्डहरू राखिएको छ भने पोखरा अन्तर्राष्ट्रिय विमानस्थलको ट्राफिक व्यवस्थापनका लागि नागरिक उड्डयन प्राधिकरणबाट १० थान ट्राफिक कोण र २ थान ह्विल लक प्राप्त भएको सुवेदीले जानकारी दिए ।