बलात्कार घटाउन ‘मृत्युदण्ड होइन, लिंग काटिदिनुपर्छ:ज्योति मगर

ज्योती मगर, लोक तथा दोहोरी गीतकी चर्चित गायिका तथा मोडल हुन् । भलै, उनको चर्चा कहिले सकारात्मक किसिमले हुन्छ त कहिले नकारात्मक किसिमले । यद्यपी, ज्योतीलाई नजिकबाट बुझ्ने सहकर्मीहरुले ज्योतीलाई वास्तबमा राम्रो कलाकार भएको टिप्पणी गर्ने गरेका छन् ।मोडलिङ तथा गायनमा वर्षौदेखी सक्रिय ज्योती आफ्ना विषयमा बजारमा चल्ने हल्लाको पछि कहिल्यै नलाग्ने गरेको बताइन् । उनी भन्छिन्, ‘आफ्नो तर्फवाट सधै राम्रो काम गर्नुपर्छ, अरुले के भन्छन् र के गर्छन् भन्ने कुराको मैले खासै मतलब राख्दिँन ।’ दर्शकलाई मनोरन्जन चाहिएकाले आफुले दर्शकका लागि फरक किसिमले मनोरन्जन प्रदान गरिरहेको उनले बताइन् ।

हालै ज्योतीले नेपालमा बढ्दै गएको बलात्कारको विषयमा विशेष धारणा राखेकी छिन् । कान्तिपुरका रामजी ज्ञवालीसँगको भेटमा ज्योतीले भनिन्, ‘बलात्कारको कारण त बलात्कार जसले गर्छ उनिहरुलाई सोध्नुस्, तर बलात्कार घटाउन के गर्ने ? त्यसको समाधान गर्ने एउटा उपाय मसँग पनि छ ।’

मन मिलेको खण्डमा जे गर्नुस्, तर मन मिल्दैन भने कसैलाई जर्बजस्ती नगर्नुस्, ज्योतीले भनिन्, ‘यदि त्यसो गर्नुभयो भने प्रतिफल चाँडै मिल्नेछ ।’ उनले नेपालमा बलात्कार जस्तो जघन्य अपराधलाई सरकारले गम्भिर मुद्धाको रुपमा लिन नसकेकोमा दुःख मानेकी छिन् । ‘बलात्कारपछि पीडक समाजमा खुलेआम हिड्छ अनि कसरी रोकिन्छन् घटना ?, भनिन्, ‘बलात्कारीले नै मेरो मान्छे नेतृत्वमा छ भन्दै हिड्छ र प्रशासन कार्यालयमा मिलाउने भन्दै हिडेपछि कसरी रोकिन्छ ?

हामी ज्योती मगर, रेखा थापा, तिर्सना बुढाथोकी या अरु कसैका कारण बलात्कार बढेको हैन, उनी थप्छिन्, ‘केहि पुरुषको गलत मानसिकताका कारण बलात्कारका घटना बढेका हुन् ।’ जतिसुकै लोकतन्त्र अथवा गणतन्त्र आएपनि कडा भन्दा कडा कानुन नभएसम्म यो समाधान नहुने उनले बताइन् । कानुन बलियो भयो भने बलात्कार आफै समाधान हुन्छ, उनले भनिन्, ‘पुलिस कार्यालयमा पुगेको जघन्य अपराधको घटना समेत विभिन्न व्यक्ति र प्रलोभनमा मिल्छ भने यो राज्यबाट अरु के आशा राख्नु ?’ नेपालमा धेरै प्रकारका कानुनमा संसोधन भएपनि कहिल्यै बलात्कारीलाई दिने कानुनको विषयमा नेताहरुले संसोधन गरेका छैनन्, आक्रोशित हुँदै उनले थपिन्, ‘महिला हिंसा र खासगरी बलात्कारसँग सम्बन्धित मुद्दामा मिलापत्र गराउने प्रवृत्तिलाई कडा कानुन बनाएर निरुत्साहित गर्नुपपर्छ ।’

केहि महिनाअघि कन्चनपुरको भीमदत्त नगरपालिकाकी १३ वर्षीया बालिका निर्मला पन्तको बलात्कारपछि हत्या भयो । साथीको घरमा पुगेर होमवर्क सिध्याएर घर फर्कदै गर्दा बलात्कारीको फन्दामा परिन् । बलात्कारी अझैसम्म फरार छन् । यो एउटा उदाहरण मात्रै हो, नेपालभरी निर्मला जस्ता धेरै चेलीहरुले अनायसै रुपमा ज्यान गुमाउनुपरेको छ । निर्मलाका परिवारले जस्तै सयौं परिवारले पिडकलाई कानुनको कठघरामा ल्याउन माग गर्दै आन्दोलन गरिरहेका छन् । ज्योती थप्छिन्, ‘यस्तो खालको घटना आफ्नै घरमा घट्यो भने के होला भनेर सबैले सोच्ने हो भने पक्कैपनि घटनामा कमी आउँथ्यो कि ?’

नेपालमा पछिल्ला केहि वर्षदेखी बलात्कार गर्नेहरूलाई मृत्युदण्डको व्यवस्था गरिए बलात्कार घट्छ र यौन हिंसाका घटनामा कमी आउँछ भन्दै बेला–बेलामा आन्दोलन भैरहेको पाइन्छ । बलात्कारीलाई मृत्युदण्ड दिने कानुनी व्यवस्थाको माग गर्नेहरूले अत्याधिक धेरै छन् । तर, के मृत्युदण्डले बलात्कारको शृंखला घटाउन साँच्चिकै मद्दत पुग्छ त ? ज्योती भन्छिन्, ‘बलात्कारीलाई मृत्युदण्ड दिइसकेपछि त्यसले कहिल्यै सजाय भोग्न पाउँदैन, उसलाई सधैभरी सजाय दिनेहो भने त्यसको तुरुन्तै तलको अंगनै काटिदिए हुन्छ । त्यसपछि उसले कहिल्यै चाहेर बलात्कार गर्न नपाओस् ।’ यो खबर नारी मासिक पत्रिकामा प्रकाशित छ।