कार्यक्रममा मान्छे कम भएपछि सम्बोधन नै नगरी रिसाउँदै फर्किए मन्त्री महासेठ

जनकपुर। भौतिक पूर्वाधार तथा यातायात मन्त्री रघुवीर महासेठ गणेश युवा कमिटीको अगुवाईमा नवनिर्मित गणेश प्रतिमाको प्राणप्रतिष्ठा कार्यक्रममा सहभागी हुन काठमाडौंबाट मंगलबार गृहजिल्ला धनुषा पुगेका थिए। मन्त्री महासेठको पूर्वनिर्धारित कार्यक्रम नै थियो, त्यो। कार्यक्रमको प्रमुख अतिथिका रुपमा निमन्त्रणा पाएपछि गृहजिल्ला जनकपुर पुगेका मन्त्री महासेठ कार्यक्रमलाई सम्बोधन नै नगरी काठमाडौं फर्किएका छन्।

कार्यक्रमलाई सम्बोधन नगरी फर्किनुको कारण हो– जनसहभागिता कम हुनु। जनसहभागिता कम भएको भन्दै मन्त्री महासेठ कार्यक्रमलाई सम्बोधन नगरी हिँडेका हुन्। गणेश पूजनोत्सवमा सहभागी भए पनि सार्वजनिक कार्यक्रमलाई सम्बोधन नगरी मन्त्री महासेठ फर्किए। तर, दर्शक कम भएकाले मन्त्री महासेठले कार्यक्रमलाई सम्बोधन नगरे पनि आयोजकले भने अत्यधिक गर्मीका कारण कार्यक्रम स्थगित गरिएको दाबी गरेको छ।

रामचौकस्थित धनुषसागरको पश्चिमी घाटमा नवनिर्मित गणेश मन्दिरको उद्घाटन तथा गणेश प्रतिमाको प्राणप्रतिष्ठा कार्यक्रममा सहभागी हुन मन्त्री महासेठ मंगलबार दिउँसो १ बजे पुग्दा आयोजक संस्थाका केही सदस्यबाहेकको अन्यको उपस्थिति न्यून थियो। मन्त्री महासेठले न्यून सहभागितालाई दृष्टिगत गरी पहिले पूजाअर्चना गर्न निर्देशन दिएका थिए। मन्त्री महासेठले पूजापाठमा झण्डै ४५ मिनेट बिताए पनि सहभागी नबढेपछि नबोली फर्किएको आयोजक संस्थाका एक सदस्यले बताए।

तर, आयोजक संस्थाका सञ्जयकुमार सहले अत्यधिक गर्मीको कारण सहभागीहरुलाई कठिनाई हुने भन्दै मन्त्री महासेठले कार्यक्रमलाई सम्बोधन नगरेको बताए। ‘गर्मी धेरै थियो। त्यही भएर मन्त्रीज्यू सम्बोधन नगरी हिँड्नु भयो,’ उनले भने। आयोजक संस्थाका अन्य सदस्यले दिएको जानकारी अनुसार कार्यक्रममा सहभागी कम भएको भन्दै मन्त्री महासेठ आयोजकसँग रिसाएका थिए।