नवलपुरका बालबालिकालाई टाइफाइड रोगविरुद्धको खोप लगाइँदै

गंगा बिश्वकर्मा
कावासोती । नवलपरासी पूर्व (नवलपुर) जिल्लामा करिब ९० हजार जना बालबालिकालाई टाइफाइड रोगविरुद्धको खोप लगाइने भएको छ । यही चैत २५ गते देखि जिल्लामा टाइफाइड विरुद्धको खोप अभियान सञ्चालन हुने जिल्ला स्वास्थ्य कार्यालय नवलपुरका प्रमुख केशब चापागाईले जानकारी दिनुभयो ।

केन्द्र सरकारले ८१ हजार जना बालबालिकाहरुको आकलन गरेता पनि जिल्लाको आकलन करिब ९० हजार बालबालिकालाई टाइफाइड रोगविरुद्धको खोप लगाउने रहेको उहाँले सुनाउनुभयो । “ स्थानिय पालिकाहरुमा लिइएको तथ्यांक थपघट हुन सक्छ,त्यसैले हामीले ८५ हजार देखी ९० हजार सम्मका बालबालिकालाई खोप लगाउने संख्या अनुमान गरेका हौं ” उहाँले भन्नुभयो ।
प्रमुख चापागाइका अनुसार खोप लगाउनका लागि २५ गते भनिएता पनि प्रदेश सरकारले छिटै खोप पठाएमा तोकिएको समय भन्दा छिटो पनि खोप लगाउन सक्ने जानकारी दिनुभयो ।
जिल्लामा रहेका ८ वटै स्थानिय तहका १९ महिना माथिका र १५ वर्षमुनिका बालबालिकालाई टाइफाइड विरुद्धको खोप लगाइने छ । खोपबाट बचाउन सकिने रोगहरुलाई शून्यमा झार्ने सरकारको लक्ष्यअनुसार नै जिल्लामा बढ्दो टाइफाइड रोगविरुद्ध खोप अभियान सञ्चालन गर्न थालिएको हो ।
त्यसैक्रममा आज (बुधबार) मध्यविन्दु नगरपालिका , बिनयी त्रिबेणी गाउँपालिका र हुप्सेकोट गाउँपालिकामा योजना तर्जुमा गोष्ठी गरिएको प्रमुख चापाँगाईले बताउनुभयो ।
त्यस्तै बिहिबार कावासोती नगरपालिका , गैंडाकोट नगरपालिका र देवचुलि नगरपालिका योजना तर्जुमा गोष्ठी गरिने छ भने शुक्रबार बौदीकालि गाउँपालिका र बुलिङटार गाउँपालिकामा गोष्ठी राखीने उहाँले बताउनुभयो ।
योजना तर्जुमा गोष्ठी गर्दा पालिकाकै स्वाथ्य शाखा प्रमुख , स्वाथ्यकर्मीहरुको सहभागितामा गरिने छ । त्यस्तै २२ गते खोपकर्ताहरुलाई २ दिनको अभिमुखीकरण प्रदान गरिने छ । टाइफाइड रोगविरुद्धको खोपका लागि जिल्लामा अनुमानित ६ सय देखी ६ सय ५० सम्म खोप केन्द्र रहने छ भने प्रत्येक खोपकेन्द्रमा १ जना स्वाथ्यकर्मी र बिद्यालयको एक महिला शिक्षक सहित २ जना स्वंयमसेवक खटिने उहाँले बताउनुभयो ।
जिल्लामा खोप लगाउनका लागि १ सय ५० जना खोपकर्ताहरुलाई तालिम दिने उहाँले बताउनुभयो ।
टाइफाइड रोग दूषित पानी र खानेकुराबाटै सङ्क्रमण हुने रोग हो । चैत÷वैशाखमा धुलोधुवाँ बढ्ने, गर्मीले खानेकुरा पनि सफा नहुने भएकाले रोग फैलिने जोखिम हुन्छ । कार्यालयका अनुसार खोपबाट कोही बालबालिका नछुट्ने गरी कार्यक्रम प्रभाबकारी रुपमा अभियान सञ्चालन गरिने उहाँले बताउनुभयो ।
जिल्लामा आर्थिक वर्ष २०७६÷७७ मा ३ हजार पाच सय आव २०७७÷७८ मा दुई हजार एक सय र चालु आर्थिक वर्षको आठ महिनामा २२ सय जना नागरिक टाइफाइडका बिरामी रहेको स्वास्थ्य कार्यालयको तथ्याङ्कमा उल्लेख छ ।