दाउन्नेमा सवारी दुर्घटना ११ जना घाइते ,२ जनाको अवस्था गम्भीर

परासी ।  पूर्वपश्चिम राजमार्गअन्तर्गत पश्चिम नवलपरासीको दाउन्नेमा सवारी दुर्घटनामा परी ११ यात्रु घाइते भएका छन् । वर्दघाट ४ मा पर्ने दाउन्ने एस मोडको ओरालोमा आज बिहान ८ बजे  लु १ ख ८७७१ नम्बरको यात्रुवाहक बस र एम  एच ०४ ईएल ७८६० नम्बरको भारतीय ट्रक एक आपसमा  ठक्कर खाँदा सो दुर्घटना भएको हो ।

इलाका प्रहरी कार्यलय बर्दघाटका प्रमुख प्रहरी निरीक्षक कृष्णप्रसाद घिमिरेका अनुसार घाइतेहरूको चिसापानी अस्पताल बर्दघाटमा उपचार भइरहेको छ । घाइतेहरूमध्ये ९ जनाको अवस्था सामान्य रहेको २ जनाको अवस्था गम्भीर रहेको छ ।

पूर्वपश्चिम राजमार्ग विस्तारको क्रममा दाउन्ने खण्डमा रहेको खाल्डाखुल्डी र धुलोका कारण दुर्घटनाको जोखिम बढेको छ ।