कावासोती बजारमा जंगली बदेलको आतंक दुई प्रहरी घाइते

कावासोती । पूर्वि नवलपरासीको कावासोती बजारमा जंगली बदेलले आतंक मच्चाएको छ । आइतबार बिहान कावासोतीको थकालीचोक ,सभापती चोक , थानाचोकमा बदेलले आतंक मच्चाएको हो । जिल्ला प्रहरी कार्यालय नवलपुरले दिएको जानकारी अनुसार बदेलले बाटो हिडेने मान्छे सहित डिउटीमा रहेको दुई प्रहरीलाई समेत घाइते बनाएको छ ।

आज आइतबार बिहान करिब साढे ६ बजेको समयमा बदेलले आतंक मच्चाएको प्रहरीले जनाएको छ । बदेलको आक्रमणबाट जिल्ला प्रहरी कार्यालय नवलपुरमा डिउटी गरिरहेका प्रहरी जवान सम्झना पराजुली र ट्राफिक प्रहरीको सहायक हवल्दार जमुना उपेद्री घाइते भएका छन् । घाइते पराजुलीको भरतपुरमा र उपेद्रीको जिल्ला अस्पताल मध्यविन्दुमा उपचार भइरहेको प्रहरीले जनाएको छ । आतंक मच्चाउने बदेल अहिले जंगल पसेको छ ।