‘स्वस्थ जीवनका लागि पर्यावरण बचाउनुपर्छ ’ : यूवा नेता विद्रोही गिरी

कावासोती । स्वस्थ जीवनको आधार पर्यावरण भएकाले बचाउनुपर्ने यूवा नेता विद्रोही गिरीले बताउनुभएको छ । बुधबार नवलपुरको कावासोतीमा नमूना सन्देश साप्ताहिको आठौं बार्षिकोत्सवको अवसरमा आयोजित पर्यापर्यटनको सम्भावना र चुनौती बिषयको कार्यक्रममा उहाँले उक्त कुरा बताउनुभएको हो ।
पृथ्वीमा भएका बिबिध तत्वको आत्मनिर्भरताका कारणले गर्दा मानव जाति पर्यावरणको बचावट र संरक्षणका लागि चिन्तित हुनुपर्नेमा उहाँको जोड थियो । पर्यावरणमा देखिने असन्तुलनले मानिसका आर्थिक, सामाजिक, जैविकलगाएतका क्रियाकलापमा प्रत्यक्ष तथा अप्रत्यक्षरुपमा प्रभावित हुन्छन् त्यसैले पर्यावरणका संरक्षण मुख्य दायित्व हो गिरीले भन्नुभयो —‘नवलपुर जिल्ला पर्यापर्यटनको उत्कृष्ट गन्तब्य हो’।

चितवन राष्ट्रिय निुकञ्जको क्षेत्र, मध्यवर्ती क्षेत्र, सिमसार क्षेत्र, टरुवाताल, सामुदायिक वन , नारायणीनदी, कालीगण्डकी, देवचुली, वरचुली क्षेत्र पर्यापर्यटनको उत्कृष्ट गन्तब्य रहेकाले यस ठाउँको पर्यटन पूर्वाधार बिकासमा सरकारले ध्यानदिनुपर्ने उहाँले बताउनुभयो । नेपाल पर्यटन पत्रकार मञ्चका संस्थापक अध्यक्ष समेत रहनु भएका गिरीले जलवायू परिवर्तनमा सबैतहका सरकारले अनुकुलन कार्यक्रम गरी पर्यावरण बचाउनुपर्ने धारण राख्नुभयोे । कार्यक्रममा पूर्वमन्त्री एवम् गण्डकी प्रदेश सांसद रोशनबहादुर गाहाले राजनैतिक नेतृत्वले अगाडि सारेका विकास र अवधारणका काम प्रशासन क्षेत्रबाट सम्पादन नहुदा समस्या हुने गरेको बताउनुभयो । कार्यक्रम राम्रो छ कार्यन्वयन गर्ने निकायले काम नगर्दा नेतृत्वले आलोचना खेप्नु परेको गुनासो गर्नुभयो । जिल्ला समन्वय समिति नवलपुरका प्रमुख बाबुराम बिश्वकर्माले जिल्लाको पर्यटन गुरुयोजना निर्माणका लागि आबश्यक छलफल गर्न जिल्ला समन्वय समिति तयार भएको बताउनुभयो ।

जिल्लाको पर्यटकीय पूर्वाधार लगाएका क्षेत्रमा लगानी गर्ने गरी योजना ल्याउन लागेको जिसस प्रमुख बिश्वकर्माले बताउनुभयो ।
कावासोतीका नगर प्रमुख बिष्णुप्रसाद भुसाल, नवलपुर पर्यटन समितिका फङ्सराम महत्तो, इको कोरिडोरका देवनारायण महत्तो, होमस्टे महासंघ गण्डकीका अध्यक्ष धनीराम महत्तो, नेपाल पत्रकार महासंघ गण्डकीका अध्यक्ष नारायण शर्मा, नेचर गाइड सुदन लम्साल , पत्रकार महासंघ नवलपुरका अध्यक्ष विरेन्द्र पराजुली, लगाएकाले बोल्नु भएको थियो ।
कार्यक्रम पत्रिकाका प्रकाशक भविश्वर पाण्डेको अध्यक्ष, सह सम्पादक तिर्थराज डुम्रे र अर्जुन सापकोटाका सञ्चालनमा भएको थियो ।