इलामको रंगमञ्चमा चियाबारीको बेग्लै कथा (तस्वीर)

काठमाडौं । इलाम भन्नेबित्तिकै चिया बुझिन्छ । हेर्दाखेरि कसैले हरियो गलैंचा बिछ्याएजसरी लमतन्न फैलिएका छन् इलामका चियाबारी । श्रमिकहरुले चिया टिपेका कथा रोमान्टिक तरिकाले बढाइचढाइँ पोखिएकै छन् । तर चियाबारीमा टिपिएका मीठा चियाहरुको वास्तविक कथा र त्यसको स्वाद चाहिं मीठो नै होला त ? कि हामीले सुन्दै आएको भन्दा भिन्न कथा होला ?चेतना नाट्य समूहले यसै प्रश्नको जवाफ ‘चियाबारी : मीठो चियाको कथा’ नाटकबाट खोज्ने प्रयास गरेको छ । क्लासी ग्लासमा होइन, झर्केबटुकामा चिया पिउने, अनि त्योसँगै आफूहरुको सास्तीबारे कुरा गर्ने महिलाहरु यसका मुख्य पात्र हुन् ।उनीहरुले डेढ सय वर्षयताको चियाको वास्तविक इतिहासमा आफूहरु किन छुट्यौं भन्ने प्रश्नमाथि विवेचना गरेका छन् । किनभने श्रमिकले चिया फलाउँछ, उद्योगीले बजारसम्म त्यसलाई पुर्‍याउँदा वास्तविक किसान कति फाइदा वा नोक्सानमा पर्छ कसैले हेरेको छैन ।इलाम सदरमुकामको टुँडिखेलमा चेतना नाट्य समूहले देखाइरहेको यो नाटकलाई अन्वेश थुलुङले निर्देशन गरेका हुन् । यसअघि बसन्त बस्नेतको उपन्यास ‘महाभारा’लाई नाटकमा रुपान्तरण गरेर ठूलो वाहवाही बटुलेका अन्वेश मोफसलमा पनि सीमित प्रविधि, प्रप्सलगायतका आधारमा पनि उम्दा नाटक देखाउन सकिन्छ भनेर लागिपरेका युवा हुन् ।