कावासोतीमा रहेको पोखरी ताल क्षेत्रमा विभिन्न पूर्वाधार निर्माण कार्य सुरु

नवलपुर । नवलपरासी बर्दघाट सुस्तापूर्व नवलपुरको कावासोतीमा रहेको पोखरी ताल क्षेत्रमा विभिन्न पूर्वाधार निर्माण कार्य सुरु गरिएको छ । कावासोती –१, मा अवस्थित पर्यटकीय क्षेत्र पोखरी तालको थप विकासका लागि विभिन्न निर्माण कार्य सुरु गरिएको कावासोती नगरपालिका वडा नम्बर –१, का वडा अध्यक्ष तबारक अहमद मियाले बताए।पर्यटकीय दृष्टिकोणले जिल्लाकै प्रमुख पर्यटकीय गन्तव्य बन्नसक्ने यस क्षेत्रमा आवश्यक पूर्वाधार निर्माण गर्न नसक्दा ओझेलमा पर्दै आएको छ । साथै ताल क्षेत्रमा पानी नअडिने समस्याले तालमा पानी अड्याउनै समस्या हुने गरको छ । त्यसकारण हालै कावासोती नगरपालिकाले रु। ३ करोड ५ लाख २७ हजारको लागतमा विभिन्न संरचनाहरू निर्माण गर्न लागिएको वडा अध्यक्ष मियाले बताए ।तालमा पानी टिकाउन समस्या भएसँगै पहिलो चरणमा अहिले तालको भित्री भागमा एक हजार ३ सय मिटर लम्बाइको वरपर ढुङ्गाको पर्खाल लगाउन सुरु गरिएको छ । तालको ढिकसँगै जोडेर ६ दशमलब ५ मिटर उचाइको पर्खाल बनाउन लागिएको वडा अध्यक्ष मियाले बताए । यसले तालमा पानी लामो समयसम्म टिकाउ सहयोग पुग्ने उनले बताए । पोखरी तालको वरपर करिब ७ सय मिटर लम्बाइको पैदल मार्ग निर्माणको काम समेत सुरु गरिएको वडा अध्यक्ष मियाले बताए। तालको वरपर प्रतिक्षालयहरु निर्माण गर्ने साथै दुई ठाउँमा ढुङ्गाको लागि स्टेसन निर्माण गरिने उनले बताए । यि संरचना निर्माणले ताल क्षेत्रको आकर्षण थप बढ्ने वडा अध्यक्ष मियाले बताए।पोखरी ताल क्षेत्र ताल रहने क्षेत्र र पार्क गरि कुल १८ हेक्टर क्षेत्रफलमा फैलिएको छ । वरपर विभिन्न वनस्पति रोपिएको छ । साथै गैँडा, बाघ, फोटो खिच्ने स्थान सहित विभिन्न संरचना निर्माण गरिएको छ । हाल निर्माण गर्न लागिएको संरचनाले ताल क्षेत्रको आकर्षण थप बढ्ने अध्यक्ष मियाले बताए। ‘ताल क्षेत्र प्राकृतिक रुपमा आफैमा रमाइलो स्थानमा रहेको छ, थप पूर्वाधार निर्माणसँगै पर्यटकको आकर्षण थप बढ्ने अपेक्षा छ’ अध्यक्ष मियाले भने ।

पूर्व पश्चिम राजमार्ग देखि करिब ६ किलोमिटरको दूरीमा रहेको पोखरी ताललाई केन्द्रित गरि सहज पहुँचका लागि सडकको स्तरोन्नतिको काम समेत सँगै बढाइएको छ । कावासोती –१, र ६ को सिमानामा पर्ने हरियाली चोक देखि स्लाम चोक हुँदै कोइलापानीसम्म २ दशमलब ७ किलोमिटर सडक कालोपत्रेको काम समेत अघि बढाइएको वडा अध्यक्ष मियाले बताए ।नगर भित्र पर्यटन क्षेत्रको विकास , सडक, नाला सहितका पूर्वाधारको विकास , मानव वन्यजन्तु द्धन्द न्यूनिकरणका विषय प्राथमिकता दिएर काम अघि बढाइएको कावासोती नगरपालिका नगर प्रमुख विष्णुप्रसाद भुसालले बताए । पोखरी ताल क्षेत्रको विकास सहित विभिन्न योजना सञ्चालन गर्ने गरि रु। ५६ करोड बराबरका योजना सम्झौता भएर काम अघि बढेको नगर प्रमुख भुसालले बताए। पोखरी ताल क्षेत्र आफैमा पालिकाको प्रमुख पर्यटकीय क्षेत्र भएकाले समेत यसलाई समेत प्राथमिकतामा राखेर काम सुरु गरिएको उनले बताए ।