भारतमा आम निर्वाचन , मतदान ११ अप्रिलबाट सुरु / निर्वाचन ७ चरणमा हुने

नयाँ दिल्ली– भारतमा आम निर्वाचनको मिति घोषणा  भएको छ । आइतबार भारतीय चुनाव आयोगले आम निर्वाचनको मिति घोषणा गरेको हो ।  घोषित समयतालिका अनुसार भारतमा ७ चरणमा निर्वाचन हुने भएको छ । मतदान ११ अप्रिलबाट सुरु भई १९ मे मा सकिनेछ  भने २३ मेबाट मतगणना सुरु हुनेछ । विश्वकै सवैभन्दा ठूलो लोकतान्त्रिक मुलुक भारतमा हुने राष्ट्रिय निर्वाचनमा अर्बौ मतदाताले सहभागिता जनाउने छन् ।

भारतको संविधान अनुसार तल्लो सदनमा ५४३ जना सांसद निर्वाचित हुने छन् । यो निर्वाचनपछि भारतमा फेरी पाँच बर्षका लागि नयाँ संसद र सरकार गठन हुनेछ ।

नयाँ सरकारका लागि वर्तमान प्रधानमन्त्री नरेन्द्र मोदी र काँग्रेस अध्यक्ष राहुल गान्धीबीच प्रतिश्पर्धा हुने देखिएको छ ।  उनीहरुको बाहेक देशभरी सयभन्दा बढी पार्टीहरु पनि प्रतिश्पर्धामा रहने अधिकारीहरुले बताएका छन् । यसअघि सन् २०१४ मा भएको निर्वाचनमा बहुमत प्राप्त गरी भारतीय जनता पार्टी (भाजपा) का नेता मोदी प्रधानमन्त्रीमा निर्वाचित भएका हुन् ।  हिन्दु राष्ट्रवादी मुद्धा, मोदीको व्यक्तिगत लोकप्रियता, आकर्षक चुनावी नारा, पाकिस्तानसँगको लडाईलगायतका कारणले मोदीले निर्वाचन आफ्नो पक्षमा पार्न सफल भएको बताउने गरिएको छ ।

भारतको राजनीतिमा लामो समयदेखि प्रभावशाली परिवारको रुपमा रहेको गान्धी परिवारका नयाँ उत्तराधिकारी राहुलसँग बाल्यकालमा चिया बेचेका मोदीको प्रतिश्पर्धा रोचक हुने भारत सञ्चारमाध्यमहरुले लेखेका छन् ।

यस्तो छ चुनाव तालिका 
पहिलो चरण :  ११ अप्रिल : ९१ सिट

दोस्रो चरण : १८ अप्रिल : ९७ सिट

तेस्रो चरण : २३ अप्रिल : ११५ सिट

चौथो चरण : २८ अप्रिल : ७१ सिट

पाँचौं चरण : ६ मे : ५१ सिट

छैटौं चरण : १२ मे : ५९ सिट

सातौं चरण : १९ मे : ५९ सिट