८४ वर्ष पुगेका जेष्ठ नागरिकलाई सम्मान

दिपक काफ्ले
कावासोती, १९ असार । मातृभूमी युवा क्लव कावासोती–६ पूर्वटोलले कावासोती नगरपालिका वडा नं. ६ भित्र बसोबास गर्ने ८४ वर्ष पुगेका जेष्ठ नागरिकलाई बिहिबार सम्मान गरेको छ ।
कावासोती नगरपालिका वडा नं. ६ को सहयोग तथा क्लवको आयोजनामा वडा भित्र बसोबास गर्ने ८४ वर्ष पुगेका १७ जना जेष्ठ नागरिकलाई बिहिबार सम्मान गरिएको हो । कार्यक्रमका प्रमुख अतिथि कावासोती नगरपालिका वडा नम्बर ६ का वडा अध्यक्ष हेमप्रसाद पाण्डे सहित अतिथिहरुले ८४ वर्ष पुगेका जेष्ठ नागरिकलाई नगद एक हजार रुपैया सहित दोसल्ला ओढाएर सम्मान गरका हुन् ।
सम्मान ग्रहण पछि जेष्ठ नागरिकहरुले क्लवले आफुहरुलाई सम्झना गर्दै सम्मान गरेको भन्दै खुशि व्यक्त गरे । वृद्ध भत्ता र विभिन्न समयमा हुने यस्ता सम्मानको कार्यक्रमले आफुहरुलाई दैनिकी खर्चको लागि सहयोग पुगेको उनिहरुले बताए ।

कार्यक्रममा बोल्दै प्रमुख अतिथि हेमप्रसाद पाण्डेले वडा स्तरबाट जेष्ठ नागरिकलाई सम्मान गर्न सदैव आफु क्रियाशिल रहने प्रतिबद्धता व्यक्त गरे । क्लवका पूर्व अध्यक्षहरु ज्ञान प्रसाद डुम्रे र याम बहादुर थापाले जेष्ठ नागरिक समाजको गहाना भएको भन्दै उनिहरुको सम्मान सबैले गर्नु पर्ने बताए ।
क्लवका अध्यक्ष भरत गौडेलले जेष्ठ नागरिक सम्मानको लागि क्लव सदैव क्रियाशिल हुने बताए । उनले क्लवले सञ्चालन गरेको एम्बुलेन्स सेवाबाट वडा भित्र बसोबास गर्ने जेष्ठ नागरिकलाई सहुलियतमा सेवा प्रदान गर्ने प्रतिबद्धता जनाए ।
क्लवका सचिव तिर्थराज डुम्रेले सञ्चालन गरेको कार्यक्रममा क्लवका सदस्य मोहन चापागाईंले स्वागत मन्तव्य राखेका थिए ।