जनता मावि त्रिभूवनटारको भवन निर्माणमा प्रधानाध्यापकले अनियमितता गरेको आरोप

कावासोती । कावासोती नगरपालिका १४, त्रिभूवनटारस्थित जनता माध्यामिक विद्यालयमा भवन निर्माण प्रकृयामा अनियमितता गर्न खोजिएको पाइएको छ । जनता माध्यामिक विद्यालयमा भूकम्प पुनर्निमाण मार्फत बनाउन लागिएको भवनको कोटेशनमा चलखेल गरी अनियमितता गर्न खोजिएको हो । कविर ७० लाख ४० हजारको लागतमा भवन निर्माणको कार्य अगाडि बढाउन लागिएको छ । विद्यालयले भवन निर्माणका लागि आवश्यक पर्ने सामाग्रि खरिदका लागि तीन पटकसम्म कोटेशनको सूचना प्रकाशित गरेको छ ।
पहिलो पटक जेठ ८ गते निकालिएको कोटेशनको समया अवधि जेठ १४ गते सम्मका लागि तोकिएकोमा तीन वटा व्यवसायीले दर भाउपत्र पेश गरेका थिए । विद्यालयले जेठ १४ गतेका तीन व्यवसायीको दरभाउपत्र राखेको भएपनी एउटा भने समय अवधि भित्र नपरेको भन्दै आएको छ । सो दरभाउ पत्र अनुसार न्यू राजेश हार्डवेएर एण्ड सेनेटरीको दर कम भएको भए पनि विद्यालयले समयमा न्यूनतम कोटेशन नपरेको भन्दै पहिलो सूचना रद्ध गरेर दोश्रो सूचना जेठ ३२ गते प्रकाशन गरेको छ । तर व्यसायीले भने आफूले समयमै विद्यालयमा कोटेशन बुझाएको बताएका छन् ।
जेठ ३२ गते प्रकाशित गरेको दोश्रो कोटेशन आवहनमा जेठ १६ गते प्राप्त कोटेशनलाई देखाउदै सामाग्रि लिन खोजेको भए पनि हार्डवएरले सामान उपलब्ध नगराएको भन्दै तेश्रो पटक असार ३० गते सूचना प्रकाशित गरिएको छ । जस अनुसार ४ जनाले दरभाउ पत्र बुझाएको छन् । आर के हार्डवेएर, न्यू.एल.बि. इन्टर प्राईजेज् एण्ड सप्लायर्स,प्रकाश इन्टरप्राइजेज र एम.सी. सप्लायर्सले कोटेशन बुझाएका छन् । प्राप्त कोटेशनको आधारमा आर.के. हार्डवेयरको दर कम भए पनि विद्यालयले धेरै दरमा प्रकाश हार्डवेयरसँग खरिद गर्ने सम्झौता गरेको छ । सस्तो दरमा कोटेशन पर्नेकोभन्दा महंगो दरमा कोटेशन दिनेबाट विद्यालयले सामाग्रि खरिद गर्ने निर्णय गरेसँगै अन्य कोटेशन दिने व्यवसायीले बिरोध गर्दै भ्रष्टचार गर्न खोजिएको आरोप लगाएका छन् । उनीहरुले जिल्ला प्रशासन कार्यालय,नगरपालिकाको कार्यालय र शिक्षा इकाईमा छानविनका लागि निवेदन दिएका छन् । विद्यालयका प्रधानाध्यापक गिरीराज गिरीले सामाग्रि छनौटमा चलखेल गरेको अन्य कोटेशन दिने व्यवसायीले आरोप लगाउदै आएका छन् । आर.के. हार्डवेयरले छडका लागि ७२।९०, ७६।५० पैसा र सिमेन्ट ओपिसी ७०५, पिपिसी ५९५मा उपलब्ध गराउने कोटेशनमा उल्लेख गरेको छ । यता छनौटमा परेको प्रकाश हार्डवेयरले छड ७३।८५,७७।८५ र सिमेन्ट बिभिन्न ब्राण्डमा ओपिसी ७३०, ७५० त्यस्तै पिपिसी ६०५, ६३० र ७४० उल्लेख गरेको छ ।
तर विद्यालयले प्रकाश हार्डवेयरबाट सामाग्रि खरिद गर्ने भनी साउन तीन गते सम्झौता गरेको छ । सम्झौता गरिएको प्रकाश हार्डवेयरले कर चुक्ताको कागत समेत २०७३,७४ को बुझाएको छ । पछिल्लो कर चुक्ताको कागज नबुझाएको समेत जनाइएको छ ।
विद्यालयका प्रधानाध्यापक गिरिराज गिरीले भने त्रुटि भएको भन्दै शुक्रबार  यसलाई सच्चाउने बताउनुभएको छ । विद्यालयमा कम दर पर्नेबाट सामाग्रि खरिद गर्ने छलफल भएको र सोही अनुसार हुने प्रधानाध्यापक गिरीले बताउनुभयो । समयमा विद्यालयको भवन निर्माण गर्नुपर्ने भएकाले हार्डवेएर व्यवसायीहरूसँग समेत छलफल गरेको र आज पुरानो सम्झौता बदर गरेर नया“ कम दर देखिएकोबाट खरिद गर्ने कुरा भएको उहाले बताउनुभयो ।
यता कम दरमा कोटेशन बुझाउने आर.के. हार्डवेयरका कृष्ण भण्डारीले भने आफूहरुले आफ्नो सामान बेच्न यस्तो नगरेको बताउनु भएको छ । आफूहरुले मात्र प्रकृया गतल भएको र विद्यालयमा अनियमितता नहोस भनेर आवाज उठाएको बताउनुभयो ।