२५ वर्ष देखि बसोवास गर्दै आएको जग्गामा देवचुली नगरपालिकाले उठिबास लगाएपछी वडा सदस्यको बिचल्ली

भिम भुसाल, देवचुली ।

विगत २५ वर्षदेखि देवचुली नगरपालिका ७ मा रहेको राधाकृष्ण मन्दिरको जग्गामा बसोबास गर्दै आएकी चुरीकलाको परिवार, बिचल्लीको अवस्थामा आईपुगेको चुरीकला शर्माले बताउनुभएको छ । देवचुली नगरपालिकाको न्यायिक समितिको निर्णयले परिवारलाई बिचल्लीको अवस्थामा पुर्याएको शर्माले आरोप लगाउनुभएको हो । राधाकृष्ण मन्दिरको नाममा रहेको ४ कठ्ठा क्षेत्रमा बसोबास गर्दै आउनुभएकी चुरीकला शर्माको परिवारलाई नगरपालिकाले सार्वजनिक जग्गाबाट निष्किन पत्र काटेपछी उठिबासको अवस्थामा पुगेको गुनासो गर्नुभयो ।
वर्षौ अगाडि ऐलेनि जग्गालाई चुरीकलाको परिवारले खरीद गरी बसोवास गरेको भएता पनि जग्गा पासको कानुनी कागजात नहुदा परिवार बिचल्लीको अवस्थामा पुगेको वडा सदस्य समेत रहनुभएकी चुरीकला शर्माको गुनासो छ ।
यता देवचुली नगरपालिकाको न्यायिक समितिमा सामाजिक न्याय पाउँ भनि चुरीकलाले दिनुभएको निवेदन माथि देवचुली नगरपालिकाले गत वर्ष नै निर्णय गरीसकेको छ ।

वि.सं. २०५५ सालमा तत्कालिन देवचुली गा.वि.स. अध्यक्ष स्वर्गिय हेम बहादुर गुरुङ्गले मोहिनी हक बापत ४ कठ्ठा उपभोगका लागी सिफारीस दिनुभएको थियो ।
क्रमश वि.सं. २०६३ साल कात्तिक २८ गतेको गा.वि.स. सर्वदलिए भेलाले मन्दिरको नाममा रहेको ४ कठ्ठा मध्ये मुख्य बाटोको मोहोडामा रहेको १० धुर मन्दिरको नाममा,१ कठ्ठा सार्वजनिक र बिचमा रहेको २ कठ्ठा १० धुरमा बनेको संरचना चुरीकलाको परिवारलाई उपलब्ध गराउने भनि निर्णय गरेको शर्माले बताउनुभयो ।
मन्दिर संस्थापक संरक्षक स्वर्गिय यसोधा न्यौपानेद्धारा देवचुली १ ग कित्ता नम्बर २१७, २३५ र २३६ को ३ कित्ता राधाकृण्ण मन्दिरको नाममा रहेकाले नगरपालिकाले मन्दिर क्षेत्रबाट हट्न गत बर्ष नै निर्देशन दिएको देवचुली नगरपालिका प्रमुख प्रशासकिय अधिकृत विष्णुप्रसाद भुसालले जानकारी दिनुभयो ।
नगरपालिकाले २ लाख ५० हजार रुपैया रकम चुरीकलाको परीवारलाई उपलब्ध गराउदै मन्दिर क्षेत्र छोड्न निर्देशन दिएको हो ।
श्री राधाकृष्ण मन्दिर संरक्षण समितिको शनिवार भएको प्रथम साधारण सभा तथा अधिवेशनमा पनि मन्दिर जग्गा प्रकरणको विषयमा ब्यापक छलफल भएको छ । मन्दिरको नाममा रहेको जग्गा मन्दिरलाई नै हस्तान्त्रण गर्नुपर्ने मन्दिर संरक्षण समितिले माग अघि सार्दै आएको छ । सामाजिक न्याय पाएमा मात्रै हाल बसोवास गर्दै आएको क्षेत्र छोड्न तयार हुने चुरीकला शर्माले बताउनुभएको छ ।