आज कावासोतीमा एमालेको  महङ्गी र भ्रष्टाचार बिरुद्घ जनप्रदर्शन

कावासोती । नेकपा एमाले नवलपुरले चर्को महङ्गी र भ्रष्टाचारको विरोधमा कावासोतीमा आज बृहत प्रदर्शन गर्दैछ । सरकारले महङ्गी नियन्त्रणका लागि कुनै पहल नगरेको भन्दै एमाले नवलपुर र जनसंगठनहरुको संयुक्त आयोजनामा आज जनप्रदर्शन गर्न लागेको हो ।
एमाले नवलपुर जिल्ला सचिव भिमलाल अधिकारीका अनुसार आज दिउँसो १ बजे जिल्ला पार्टी कार्यालयबाट जनप्रदर्शन सुरु हुने छ । उनका अनुसार जनप्रदर्शन पार्टी कार्यालय हुदै, सभापती चोक, इन्द्रचोक, थानाचोक हुदै फलफुलचोकमा पुगेर समापन गर्ने कार्यक्रम रहेको छ ।
जनप्रदर्शनमा कावासोती, देवचुली, मध्यविन्दु सहित जिल्लाको ८ वटै पालिका पार्टी कमिटी सहित युवा संघ, अनेरास्ववियू, खेलकुद महासंघ, किसान महासंघ, रिटर्नी फेडेरेशन, इन्जिनियरिङ एसोसियसन, अपा· संघ, ट्रेड युनियन महासंघ सहित २२ वटै भ्रातृ संगठन र शुभेच्छुक संघसंगठनका प्रतिनिधि पनि प्रदर्शनमा सहभागी हुने कार्यक्रम रहेको छ ।

सरकारका राष्ट्रघाती कदम, सरकारका बेथिति र गलत कामकाविरूद्ध जनतालाई जागरुक बनाउनु अहिलेको आवश्यकता भएको एमाले नवलपुरको ठहर छ । वर्तमान सत्ता गठबन्धनको गलत काममा खबरदारीका लागि एमालेले आम नागरिकलाई बृहत् जनप्रदर्शनमा सहभागी हुन आह्वान गरेको एमाले नवलपुरका युवा नेता बिद्रोही गिरिले जानकारी दिए । संबिधानको रक्षा र कार्यान्वयन, लोकतन्त्रको सुदृणीकरण, संघीय प्रणालीको सुदृणीकरण, जनजीविका र राष्ट्रियताको सवाल, अन्तर्राष्ट्रिय सम्बन्ध, सुशासन र भ्रष्टाचार नियन्त्रणका प्रश्नमा सरकार पुरै असफल भएको छ एमालेका युवा नेता विद्रोही गिरीले भने – ‘यस्तो परिस्थितिमा सचेत नागरिकहरु चुप लागेर बस्न हुदैन सरकारका गलत कामको निगरानी र खबरदारीका लागि मैदानमा उत्रिनुपर्छ।’ उनले भने– गठबन्धन सरकार गठन भएको एक वर्षमा खाद्यवस्तुको चर्को मूल्य वृद्धिका साथै हरेक क्षेत्रमा महंगीका कारण नागरिकको जीवन कष्टकर बनिरहेको छ ।