कावासाेतीमा प्रभावकारी भाषणकला तालिम सुरु

कावासोती । नवलपुरको कावासोतीमा दुई दिने प्रभावकारी भाषणकला तथा प्रस्तुतीकरण तालिम सुरु भएको छ । सायरा मिडिया एण्ड ईभेण्ट्स प्रालिको आयोजनामा सुरु भएको तालिममा नवलपुरका युवा , बिद्यार्थी र बिभिन्न संघसस्थामा आवद्ध महिलाहरुको सहभागिता रहेको सायरा मिडिया एण्ड ईभेण्ट्स प्रालिका अध्यक्ष रमेश बस्ताकोटीले बताउनुभयो ।
मुख्यमन्त्री तथा मन्त्रिपरिषद्को कार्यालय गण्डकी प्रदेश पोखरा संगको सहकार्यमा आयोजित सो कार्यक्रममा मुख्यरुपमा भाषणकला र प्रभावकारी प्रस्तुतीका बिषयमा प्रशिक्षण प्रदान गरिने बस्ताकोटीले बताउनुभयो । कार्यक्रमको पहिलो दिन नेपाल पत्रकार महासंघ गण्डकी प्रदेश समितिका उपाध्यक्ष दिपक भट्टराईले नवलपुरको आवश्यकतालाइ मध्यनजर गर्दै आयोजना गरिएको यस्तो तालिम निकै प्रभावकारी हुने बिश्वास व्यक्त गर्नुभयो । उहाँले तालिमले सहभागीहरुको क्षमतामा निखारता ल्याउँदै यसले उनिहरु्रको आत्मबिश्वास जागृत हुने बताउनुभयो । कार्यक्रममा नेपाल पत्रकार महासंघ नवलपुरका अध्यक्ष वीरेन्द्र पराजुलीले यस प्रकारको तालिमले आफु बोल्न सक्दिन भन्ने हिनता बोध हटाउन सहयोग पुग्ने बिश्वास व्यक्त गर्नुभयो । उहाँले जिल्लाका अन्य स्थानमा पनि यस प्रकारका तालिमको आवश्यकता रहेको भन्दै आयोजकले यस तर्फ ध्यान दिन आग्रह गर्नुभयो ।
सोहि कार्यक्रममा बोल्दै प्रेस चौतारी नेपाल नवलपुरका अध्यक्ष सालिकराम कोइरालाले तालिमबाट सिकेको सिपलाई व्यवहारमा उतार्न सहभागीहरुलाई आग्रह गर्नुभयो । कोइरालाले बोल्ने कला भनेको निकै महत्वपुर्ण बिषय भएको भन्दै यस प्रकारको तालिमले सहभागीहरुको क्षमतामा बृद्धी हुने बताउनुभयो ।
नवलपुरको कावासोतीमा स्थापना भएर आफ्नो काम गर्दै आएको सायरा मिडिया एण्ड ईभेण्ट्स प्रालिले देशभरीनै क्षमता विकास नेतृत्व विकास र अन्य संचार संग सम्वन्धित तालिमहरु संचालन गर्दै आईरहेको छ । सो कम्पनीले सत्यकलम डटकम नामक डिजिटल पत्रिका समेत संचालन गर्दै आएको अध्यक्ष बस्ताकोटीले बताउनुभयो । आजदेखि सुरु भएको तालिम भोलि सम्म संचालन हुनेछ ।