मध्यविन्दु १३ को सरस्वती माविका शिक्षक तिवारीलाई स्पष्टिकरण सोधियो

कावासोती ।  नवलपरासी पूर्व नवलपुरको मध्यविन्दु–१३ मैनाघाटमा रहेको सरस्वती माध्यामिक विद्यालयका शिक्षक कृष्ण प्रसाद तिवारीलाई निर्वाचन आयोग नेपालले स्पष्टिकरण सोधेको छ । निर्वाचन आचार संहिता विपरित दलको चुनावी गतिविधिमा सहभागी भएको भन्दै आयोगले तिवारीलाई स्पष्टिकरण सोधेको हो । निर्वाचन आयोगले पठाएको स्पष्टिकरण सम्बन्धी पत्र मध्यविन्दु नगरपालिका मार्फत सम्बन्धि शिक्षक सम्म पु¥याइएको जिल्ला निर्वाचन आचारसंहिता अनुगमन समितिका संयोजक एवं कोष तथा लेखा नियन्त्रण कार्यालय नवलपुरका प्रमुख कोष नियन्त्रक रामबहादुर केसीले बताउनुभयो ।

जिल्लामा परेको लिखित मध्ये यो एकमात्रै उजुरी रहेको र त्यो गम्भिर प्रकृतिको भएपछि तिवारीको सम्बन्धमा जिल्ला अनुगमन समितिले स्पष्टिकरण सोध्ने तयारी गरेको समयमा निर्वाचन आयोग नेपाल बाट नै स्पष्टिकरणको पत्र आएपछि स्थानीय पालिका मार्फत तिवारीलाई सो पत्र पठाइएको उहाँले जानकारी दिनुभयो । प्रतिनिधि सभाको क्षेत्र नम्बर २ (ख) अन्तगर्त मध्यविन्दु १३ को सरस्वती माध्यमिक विद्यालयका राहत शिक्षक कृष्ण तिवारीविरुद्ध चुनाव प्रचार प्रसारमा सहभागी भएको तथा नेपाली कांग्रेसको नवलपुर क्षेत्र नं. २ (ख) प्रदेश सभाको पार्टी सभापति भएको भन्दै उजुरी परेको उहाँले बताउनुभयो । तिवारीले अब २४ घण्टा भित्र स्पष्टिकरण पेश गर्नुपर्ने हुन्छ । अनुगमन समितिले गरेको प्रारम्भीक छानविनमा तिवारीको बिरुद्ध परेको उजुरी गम्भीर प्रकृतिको भएको कारण निर्वाचन आयोगले कारवाहीको लागि सम्बन्धित स्थानीय तहमा सिफारिस गर्न सक्ने उहाँले बताउनुभयो । सामाजिक सञ्जालमा आएका समान्य बाहेक अन्य जिल्लाको तुलनामा आचारसंहिता पूर्ण रुपमा पालना भएको पाईएको उहाँको दावी थियो । बुधबारमात्रै जिल्ला निर्वाचन आचारसंहिता अनुगमन समितिले जिल्लाका राजनीतिक दल, उम्मेदवारहरुलाई सचेत गराएको उहाँले बताउनुभयो । छलफलमा राजनीतिक दलका प्रतिनिधि एवं उम्मेदवारहरुले आचारसंहिता पालना गर्ने बताएको उहाँले जानकारी दिनुभयो ।