मध्यविन्दु नगरपालिकाकाे सार्वजनिक सुनुवाई सम्पन्न

चोरमारा । मध्यविन्दु नगरपालिकाकाले आर्थिक वर्ष २०७८/०७९ को वार्षिक प्रगति, आर्थिक वर्ष २०७९/०८० को प्रथम चौमासिक प्रगति समिक्षा एवम् खर्च सार्वजनिकीकरण तथा सार्वजनिक सुनुवाई कार्यक्रम गरेको छ ।
मध्यविन्दु नगरपालिकाको सभाहलमा नगर पालिका प्रमुख भिमलाल अधिकारीको अध्यक्षतामा भएको कार्यक्रममा नगरपालिकाका प्रमुख प्रशासकीय अधिकृत ज्ञानुप्रसाद पनेरुले आर्थिक वर्ष २०७८.०७९ को वार्षिक प्रगति, आर्थिक वर्ष २०७९/०८० को प्रथम चौमासिक प्रगति र खर्च सार्वजनिकीकरण गर्नु भएको थियो । मध्यविन्दु नगरपालिकाले नियमित रुपमा हुनुपर्ने सार्वजनिक सुनुवाई कार्यक्रमलाई प्राथमिकताका साथ आगामी दिनहरुमा पनि सञ्चालन गर्ने प्रतिबद्धता व्यक्त गर्नुभयो । उहाँले गत आ.व. र चालु आ.व. को प्रगति समिक्षा गर्दै मध्यविन्दु नगरपालिकामा यस आ.व.मा नीति तथा कार्यक्रम र बजेटको कार्यान्वयलाई प्राथमिकताका साथ कार्य गर्ने बताउनुभयो । उहाँले विषयगत तथा शाखागत रुपमा प्रगतिको अवस्थाबारे प्रस्तुतिकरण गर्नु भएको थियो ।
कार्यक्रममा सहजकर्ता तिर्थराज डुम्रेले नागरिक प्रतिवेदन र बर्हिगमन अभिमत पस्तुत गर्नु भएको थियो । नगरपालिकाको विभिन्न वडा तथा कार्यालयमा आउने सेवाग्राहीहरुले प्रस्तुत गरेको अभिमतलाई सक्षिप्त रिर्पोटको रुपमा प्रस्तुत गर्नु भएको थियो ।
सार्वजनिक सुनुवाई कार्यक्रममा उठेका जिज्ञासा तथा प्रश्नहरुको नगरप्रमुख भिमलाल अधिकारी र प्रमुख प्रशासकीय अधिकृत ज्ञानु प्रसाद पनेरुले जवाफ दिनु भएको थियो । उठेका सवालहरुको जवाफ दिदै नगर प्रमुख अधिकारीले भूमि सम्बन्धि समस्या समाधानको लागि नगर स्तरिय समिति गठनको तयारीमा नगरपालिका रहेको बताउनुभयो । उहाँले नगरपालिका भित्र बसोबास गर्ने भूमिहिन सुकुम्बासी, दलित अव्यवस्थित बसोबासीहरुको समस्या समाधानको लागि नगरपालिका गम्भीर रहेको बताउनुभयो ।
उहाँले नगरपालिका भित्र रहेको शुद्ध पिउनेपानीको व्यवस्थापनको विषयमा नगरपालिका गम्भीर रहेको बताउनुभयो । पालिका भित्र रहेका खानेपानी संस्थाहरुमा शुल्कमा एकरुकता ल्याउने, पानीको गुणस्तरियता र शुद्धताको विषयमा छलफल नगरपालिकाले प्रारम्भ गर्ने बताउनुभयो ।
उहाँले नगरपालिका भित्रका खोला क्षेत्रबाट भइरहेको प्राकृतिक स्रोत दोहन रोक्ने कार्य नगरपालिकाले विगत देखि गर्दै आएको भन्दै त्यसलाई कडाईका साथ लाग्ने बताउनुभयो । उहाँले नदी तथा खोला तटबन्धनको लागि योजना निर्माण तथा त्यसको लागि सम्बन्धित कार्यालयमा सहजिकरणको काम समेत भइरहेको बताउनुभयो । उहाँले मध्यवर्ती समुदायका जनताको समस्या समाधानको लागि निकुञ्ज प्रशासन संग नियमित छलफल गरिरहेको बताउनुभयो ।
उहाँले मध्यविन्दु नगरपालिकाको शैक्षिक अवस्था सुधारको लागि योजना निर्माणको काम भइरहेको बताउनुभयो । नेपाल विश्वविद्यालयको सन्दर्भमा उठेको प्रश्नको जवाफ दिदै उहाँले विश्वविद्यालय स्थापनाको लागि नगरपालिकाबाट सहमति प्रदान गरिएको बताउनुभयो ।

उहाँले मध्यविन्दु नगरपालिकाको फोहर व्यवस्थापनको लागि दिगो योजना निर्माणको काम भइरहेको बताउनुभयो । गण्डकी प्रदेश सरकारसंग यस सम्बन्धमा सम्झौता भई नवप्रवद्र्धन कार्यक्रम मार्फत प्रांगारिक मल उत्पादनको लागि आवश्यक काम अगाडी बढाएको बताउनुभयो ।
उहाँले मध्यविन्दु नगर अस्पताल निर्माणको लागि स्रोत सुनिश्चिताको कामलाई नगरपालिकाले निकै प्राथमिकताका साथ अगाडी बढाएको बताउनुभयो । विगतको सरकारले शुरुवात गरेको यो कार्यको योजना निर्माण सम्पन्न भएपनि हाल सम्म स्रोत सुनिश्चिता नहुँदा हाल नगरपालिकाको आन्तरिक श्रोतबाट आवश्यक काम अगाडी बढाएको बताउनुभयो । स्वास्थ्य चौकीमा उपलब्ध हुने औषधीहरुको सम्बन्धमा उठेका प्रश्नहरुको जवाफ दिदै प्रमुख प्रशासकीय अधिकृत पनेरुले सबै स्वास्थ्य चौकीमा आवश्यकता अनुसारको औषधी उपलब्ध रहेको बताउनुभयो ।
कार्यक्रममा विभिन्न विषयमा सरोकारवालाहरुले जिज्ञासा राख्नु भएको थियो । त्यसको नगर प्रमुख र प्रमुख प्रशासकीय अधिकृतले जवाफ दिनु भएको थियो ।
कार्यक्रममा स्वागत मन्तव्य राख्दै नगर उपप्रमुख पूर्णकला चौधरीले नगरपालिका मार्फत नियमित रुपमा कार्यक्रमहरु सञ्चालन हुने बताउनुभयो । उहाँले पारदर्शितालाई पहिलो प्राथमिकतामा राखेर काम गर्ने बताउनुभयो ।
कार्यक्रममा मध्यविन्दु नगरपालिकाका विभिन्न वडाका वडा अध्यक्ष, शाखा प्रमुख सहित विभिन्न सरोकारवालाहरुको उपस्थिति रहेको थियो ।