अर्जुनचौपारीमा बाख्रापालनको तालिम दिन गाउँपालिकाले खुलायो प्रशिक्षकको आवेदन

स्याङजा। स्याङजाको एक गाउँपालिकाले बाख्रापालनको तालिम दिनको लागि भनेर प्रशिक्षकको आवेदन खुलाएको छ । अर्जुनचौपारी गाउँपालिकाले स्थानीय कृषकलाई बाख्रापालनको तालिम दिनको लागि एकजना प्रशिक्षकको आवेदन खुलाएको हो । गाउँपालिकाको उद्यम विकास शाखाले गरिबी निवारणका लाग लघु उद्यम विकास कार्यक्रमअन्तर्गत सीप विकास तालिम गर्न लागिएको र सोही तालिमको लागि प्रशिक्षक आवश्यक परेको जनाएको छ । माघ २९ गतेसम्म बाख्रापालनको तालिम दिन इच्छुकले प्रशिक्षक बन्नको आवेदन दिन पाउँछन । प्रशिक्षकको लागि मान्यता प्राप्त संस्थाबाट तालिम प्राप्त गरेको प्रमाणपत्रलाई न्यूनतम योग्यता मानिएको छ । एक हप्तासम्म सञ्चालन हुने तालिममा प्रशिक्षकलाई भत्ता उपलब्ध गराइने गाउँपालिकाले जनाएको छ ।गाउँपालिकाको उद्यम विकास शाखाकी कर्मचारी जालमाया विकले स्थानीय कृषकहरुको आवश्यकता अनुसार तालिम दिन लागिएको र त्यसकै लागि प्रशिक्षक आवश्यक परेको बताइन । ‘वडा नं. ६ मा यो तालिम हुन्छ । त्यहाँका कृषकहरुले बाख्रापालन तालिम चाहियो भनेर माग गर्नुभयो, त्यही भएर तालिम दिन लागेका हौँ’, उनले भनिन ।

आफूहरुले तालिमको लागि सहजीकरण मात्र गरिदिएको उनले बताइन । यसभन्दा अगाडि उद्यमशीलता विकास तालिम दिइएको र त्यही तालिममा सहभागी कृषकहरुको माग अनुसार कार्यक्रम तय गरिएको उनले जानकारी दिइन । स्थानीय १० जना कृषकहरुले बाख्रापालनको तालिम मागेको उनले जानकारी दिइन ।बाख्रापालन गर्दैगर्दा लाग्ने रोग, आवश्यक पोषणको बारेमा कृषकहरुले ज्ञान पाउने गाउँपालिकाका प्रमुख प्रशासकीय अधिृकत उज्जव बहादुर बस्नेतले जानकारी दिए । ‘हामीले सात दिनको तालिम दिने हो । त्यसमा चाहिँ जो बाख्रा पालेर उद्यमी बन्छु भन्नुभएको छ, उहाँहरुलाई बाख्रमा देखिने रोग, स्याहारसुसार कसरी गर्ने, दानापानी कस्तो खुवाउने भन्नेबारेमा जानकारी दिने हो’, उनले भने ।यो कार्यक्रम सञ्चालनको लागि सरकारले ‘गरिबी निवारणका लागि लघु उद्यम विकास कार्यक्रम सञ्चालन निर्देशिका, २०७७’ जारी गरेको छ । यो कार्यविधी अनुसार नै रहेर स्थानीय तहहरुले लघु उद्यम विकास कार्यक्रम सञ्चालन गर्ने गरेका छन । कार्यक्रमका लागि सशर्त अनुदान आउने र सोही कार्यक्रम कार्यान्वयन गर्न प्रशिक्षक मागिएको उनले जानकारी दिए । उनले भने,‘उद्यमी बन्न चाहनेहरुलाई प्रशिक्षण दिने हो । प्रशिक्षकले उद्यमीहरुलाई सीपसम्बन्धि तालिम दिने हो, त्यसपछि उहाँहरु उद्यमी बन्नुहुन्छ, त्यसकै लागि हामील्ले प्रशिक्षक मागेका हौँ ।’गाउँपालिकाले मौरीपालन तालिमको लागि पनि १५ दिनको लागि प्रशिक्षक माग गरेको छ । यसबाहेक हाउस वायरिङ, सल बुनाइ र ब्याग/झोला बुन्ने तालिम पनि सञ्चालन हुनेछ । निर्देशिकाको अनुसूचीमा उल्लेख भएका कार्यक्रमहरु नै स्थानीयको माग अनुसार कार्यक्रम सञ्चालन हुनेछन ।