‘कोरोना संक्रमण देखिए सात दिनसम्म आइसोलेशनमा बस्नु’

काठमाडौं। स्वास्थ्य तथा जनसंख्या मन्त्रालयले कोरोना भाइरस संक्रमण भएमा सात दिनसम्म अनिवार्य आइसोलेशनमा बस्न आग्रह गरेको छ ।संक्रमणका कारण ज्वरो र सास फर्न कठिनाई भएको अवस्थामा सात दिनसम्म अनिवार्य रुपमा आइसोलेशनमा बस्न मन्त्रालयका सह-प्रवक्ता डा. समीरकुमार अधिकारीले आग्रह गरेका हुन्। तर, आइसोलेसनमा पाँच दिन वा त्यो भन्दा बढी बसिसकेको र कुनै पनि लक्षण बाँकी नरहेको, २४ घण्टाभित्र ज्वरोको औषधि नखाइ नै ज्वरो कम भएको भए भने आइसोलेसनमा बस्नुपर्दैन ।सात दिनसम्म आइसोलेशनमा बसेर आठौँ दिनमा बाहिर निस्केपनि अरु मानिसको सम्पर्कमा नजानसमेत मन्त्रालयले आग्रह गरेको छ ।मन्त्रालयले आइसोलेशनमा रहेकाले मिलेसम्म छुट्टै शौचालय भएको प्रशस्त हावा आउने छुट्टै कोठामा बस्ने तथा नाक, मुख र चिउडो छोपिने गरी मास्क लगाउने र प्रयोग गरिएको मास्कको उचित व्यवस्थापन गर्ने तथा बेला बेलामा साबुन पानीले हात धुन आग्रह गरेको छ ।

अहिले दैनिक कोरोना भाइरसको संक्रमण बढिरहेको छ । मंगलबार मात्रै एक सय ७१ जनामा सङ्क्रमण, दुई जनाको मृत्यु भएको छ भने तीन सय ९७ जना सक्रिय संक्रमित पुगेका छन् ।मन्त्रालयका तथ्यांक अनुसार काठमाडौं उपत्यकामा संस्थागत आइसोलेसनमा २२, आइसियू ८ र भेन्टिलेटरमा ४ कोरोना संक्रमितको उपचार भइरहेको छ ।