बुटवल – नारायणगढ सडक : सुरक्षा सामाग्रीबिनै जोखिम मोलेर काम गर्दै मजदुर

मुक्ति तिवारी , नवलपरासी । बुटवल नारायणगढ सडक निर्माणको जिम्मा पाएको चाइना स्टेट कन्स्ट्रक्सनले मजदुरहरूलाई सुरक्षा सामाग्री नदिई काममा लगाउने गरेको भेटिएको छ । कम्पनी वा काम लगाउने पक्षले सुरक्षा सामाग्री नदिँदा उनीहरू जोखिम मोलेर काम गर्न बाध्य छन् । आवश्यक सुरक्षा सामाग्री नहुँदा कामका बेला मजदुरहरूलाई दिनहुँ जसो सामान्य चोटपटक लाग्ने गरेको मजदुरहरू बताउँछन्। दिउँसो १२ बजेको समयमा खाली खुट्टा र चप्पलमै मजदुरहरू फलाममा काम गरिरहेका हुन्छन् । काम गर्दा मजदुरहरूले हेल्मेट,ज्याकेट,पन्जा,बुट र चस्मा लगायतका सुरक्षा सामाग्री प्रयोग गर्नु पर्ने भएपनी कम्पनीले मजदुरहरूलाई ती सामाग्री उपलब्ध गराएको छैन। सम्भावित जोखिम र दुर्घटनाको जोखिम मोलेर उनीहरू काम गरी रहेका छन्। चप्पल लगाएर खाली हात उनीहरू काम गरिरहेका छन् ।

‘हामी सबैलाई बुट पन्जा दिएको छैन, गाह्रो छ, माग्दा कम्पनीले दिँदैन, आफ्नै सामान्य सामान्य खालको जुत्ता लाएर आउँछौ’, फिल्डमा काम गरी रहेका एक मजदुरले भने । दैनिक ज्यालादारीमा काम गर्ने उनीहरू कम्पनीले कामबाट निकालिदिने डरले नाम खोल्न र पीडा भन्न डराउँछन् । कम्पनीले ओभर टाइमको पैसा समेत सबैलाई नदिएको मजदुरहरूको गुनासो छ। अनुगमन आउँदा मात्र कम्पनीका सुपरभाइजरले सुरक्षा सामाग्री प्रयोग गरेका केही मजदुरहरूलाई फिल्डमा राख्ने र अरूलाई नदेखिन भन्ने गरेको अर्का मजदुरको भनाई छ। ‘अनुगमन आयो भने बुट ज्याकेट र पन्जा नलाएकाहरू सबै जाओ भन्छन्। अनि हामी अनुगमन सकिएपछि मात्र आउँछौ’, ती मजदुरले भने । यता दाउन्नेदेखि बुटवल–पश्चिम् साइटका प्रोजेक्ट म्यानेजर शसाङ्क मिश्रले भने मजदुरहरूलाई सुरक्षा सामाग्री उपलब्ध गराइएको दाबी गर्नु भयो ।आफू प्रोजेक्ट म्यानेजरको रुपमा आएको केही दिन मात्र भएकाले थप बुझेर सुरक्षा सामाग्री उपलब्ध गराइने उहाँको भनाई छ । यो समाचार  onlineradionepal.gov.np बाट साभार गरिएको हो ।