नवलपुरमा वैदेशिक रोजगारबाट फर्केका युवा कृषिमा रमाउँदै

मीनाक्षी कंडेल, कावासोती । बैदेशिक रोजगारबाट राम्रो कमाउन बिदेशिएका युवाहरु अहिले स्वदेश फर्केर कृषि पेशामा रमाउन थालेका छन । पुर्र्बी नवलपरासीबाट बैदेशिक रोजगारमा जाने अधिकाँश युवाहरु पछिल्लो समय स्वदेशमा नै बिदेशको जस्तै परिश्रम गर्ने हो भने सुन फलाउन सकिन्छ भन्ने जोश र जाँगर बोकेर गाईपालन, कुखुरापालन, ब्यापार ब्यवसाय तथा अन्य कृषिमुखी ब्यवसायमा रमाउन थालेका छन । पन्ध्र वर्षदेखिको वैदेशिक रोजगारीको यात्रालाई विट मार्दै कावासोती नगरपालिका वडा नं १७ गोछडाटारका सागर लम्साल आजभोलि कागतीका बिरुवा रेखदेखमा व्यस्त छन्। प्रधानमन्त्री कृषि आधुनिकीकरण परियोजना मार्फत बिरुवामा ५० र सिँचाइमा ८५ प्रतिशत अनुदान पाएसँगै व्यावसायिक रुपमा कागती खेतीलाई अगाडि बढाउन गत वर्षदेखि सुनकागती लगाउन उनले सुरु गरे । परियोजना मार्फत पिभिसी ट्याड्ढी, ट्याड्ढी स्यान्ड, मोटर, पाइपलाइन विस्तार, सुनकागती–१ को ‘ग्राफ्टेड’ बिरुवा, घरेलु झोल मल निर्माण लगायतमा अनुदान प्राप्त भएको उनले बताए ।

थोरै लगानी र कम मेहनतबाट धेरै आम्दानी लिन सक्ने भएपछि जिल्लामा कागती खेती तर्फ कृषकको आकषर्ण बढेको छ । एकपटक लगानी गरेपछि वर्षौंसम्म आम्दानी लिन सकिने र उत्पादन पनि मनग्य हुने भएकाले अन्य बाली लगाउने किसान पनि कागती खेतीतर्फ आकर्षित भएको उनले बताए । गोछडाटारकै ४८ वर्षीय प्रेमराज ढुङ्गानाले अहिले धान बाली लगाउन छाडेर कागतीखेती सुरु गरेका छन् । उनले परियोजनाको ५० प्रतिशत अनुदानमा एक सय ५० कागतीका बिरुवा रोपेर व्यावसायिकरुपा खेती सुरु गरेका हुन । जिल्लामा यस वर्ष ५० नयाँ किसानले कागतीखेती सुरु गरेका छन । नर्सरीबाट तयार भएका २५ हजार सुन्तला र कागतीका बिरुवा यस वर्ष किसानलाई बिक्री गरिएको प्रधानमन्त्री कृषि आधुनिकीकरण परियोजना कार्यान्वयन इकाईका वरिष्ठ कृषि अधिकृत विष्णुप्रसाद शर्माले जानकारी दिए । जिल्लाको बुलिङटार, बौदिकाली र हुप्सेकोटको वडा नं ५ तथा नगरपालिकामा गैँडाकोट–१८, देवचुली–६, मध्यविन्दु–८ र १५ मा सुन्तला र फलफूल जोन कार्यक्रम सुरु भएको कृषि अधिकृत शर्माले जानकारी दिए । परियोजना सुरु हुनुपूर्व जिल्लामा तीन सय ३१ हेक्टरमा सुन्तला र कागतीको खेती हुँदै आएको थियो, कृषि अधिकृत शर्माले भने, यस वर्ष मात्रै जिल्लामा सुन्तला र कागतीको खेती ६० हेक्टर क्षेत्रफलमा विस्तार भएको छ । यस वर्ष ६० हेक्टरमध्ये ३३ हेक्टर क्षेत्रफलमा सुन्तला र २७ हेक्टरमा कागतीखेती विस्तार भएको छ भने ५० जना नयाँ किसान व्यावसायिक खेतीमा जोडिएका छन् । गैँडाकोट–१८ मा किसानले चक्लाबन्दी गरेर एउटै ब्लकमा १० हजार तीन सय बिरुवा लगाएका छन ।

जिल्लामा ३३ कृषक समूह, पाँच कृषक सहकारी र ३० उद्यमी गरेर ६८ संस्था कागती खेतीमा आबद्ध छन भने दुई हजार दुई सय ९७ धरधुरी यस खेतीमा संलग्न रहेका उनले जानकारी दिए । परियोजना अन्तर्गत जिल्लामा अहिलेसम्म तरकारी, फलफूल र कागती खेतीमा गरी एक सय २१ समूह, ११ कृषक ८० उद्यमी आबद्ध छन भने छ हजार १८ घरधुरी संलग्न रहेका छन । सिँचाइमा ८५, बीउ, बिरुवामा ५० र मेसिनरी औजारमा ८५ प्रतिशत अनुदान किसानलाई दिँदै आएको परियोजनाले जनाएको छ ।