अहिंसा बौद्ध प्रतिष्ठान कावासोतीमा नयाँ नेतृत्व चयन

नवलपुर । पूर्वी नवलपरासीको कावासोतीमा रहेको अहिंसा बौद्ध प्रतिष्ठानको बिहिबार  भएको प्रथम अधिवेशनले देवबहादुर सारु मगरको अध्यक्षतामा ११ सदस्यीय नयाँ समिति चयन गरेको छ । समितिको उपाध्यक्षमा मंगल लामा, सचिवमा जितजंग गुरुङ, कोषाध्यक्षमा रामकुमार श्रेष्ठ र सदस्यहरुमा गणेश गुरुङ, विकास गुरुङ, तिलबहादुर थापा, यामबहादुर पाटा मगर, तेजबहादुर खोजबार, देवेन्द्रकुमार गरौं र मंगले तामाङ चयन भएका छन् । अधिवेशन अहिंसा बौद्ध प्रतिष्ठानका अध्यक्ष मिनबहादुर लामाको अध्यक्षता र सचिव इन्द्र फाल मगरको सञ्चालनमा भएको थियो ।

अधिवेशनलाई सम्बोद्धन गर्दै प्रदेश सभा सदस्य एवम् पूर्व मन्त्री रोशनबहादुर गाहाले अब आदिवासी जनजाति तथा दलित समुदायले आफ्नो अधिकार सुनिश्चित गर्दै सबै जना राजनीतिक क्षेत्रमा होमिएर नेतृत्व तहमा आउनु पर्नेमा जोड दिए । उनले भने – ‘गण्डकी प्रदेशका हिमालदेखि तराईसम्म आदिवासी जनजातिहरुको बाहुल्यता रहेपनि स्थानीय तहको जनप्रतिनिधिदेखि मन्त्रसम्मका आदिवासी जनजातिहरु संख्यात्मक रुपमा पुग्न नसकेको अवस्था रहेकोले अब सबै राजनीतिमा होमिनुको विकल्प छैन ।’ गाहाले जो जुनसुकै दलमा आवद्ध भए पनि आदिवासी जनजातिको मुद्दामा एक हुनुको विकल्प नरहेको बताए ।

कार्यक्रममा जिल्ला समन्वय समिति नवलपुरका संयोजक बाबुराम विक, नेपाल आदिवासी जनजाति महासंघ नवलपुरका अध्यक्ष रामकुमार श्रेष्ठ, रुद्र गुरुङ, नरबहादुर ठाडा, धनबहादुर मास्की, लिला राना, मित्रलाल श्रेष्ठ, जगतकाजी गुरुङ, राम तामाङ लगायतले शुभकामना मन्तव्य राखेका थिए ।