डोल्पामा भेटिएको ताल तिलिचोभन्दा पनि अग्लो स्थानमा रहेको दाबी

डोल्पाका प्रमुख जिल्ला अधिकारी भूमिश्वर पोख्रेलले डोल्पोबुद्ध गाउँपालिकाका उपाध्यक्ष र वडा नम्बर ६ का वडाअध्यक्ष सहितको टोलीले तिलिचोभन्दा पनि अग्लो स्थानमा ताल फेला पारेको जानकारी आफूलाई गराए पनि त्यसको आधिकारिकता पुष्टि हुन बाँकी रहेको बताए ।‘तिन्जे भन्ने ठूलो फाँट छ । त्यहाँबाट दुई घण्टा हिँडेपछि तालमा पुगिन्छ रे । त्यहाँ तीनवटा ताल फेला पार्यौं भन्नुभएको छ । एउटा ठूलो र दुई वटा साना-साना ताल छन् रे,’ प्रमुख जिल्ला अधिकारी भूमिश्वर पोख्रेलले अनलाइनखबरसँग भने, ‘उहाँहरुले तीमध्ये कुन्ख्येन फालक ताल तिलिचो भन्दा पनि अग्लो स्थानमा छ, प्रचार प्रसार गर्नपर्यो भनेर मकहाँ आउनु भएको थियो ।’

आफूले फाल गाउँमा पनि ताल छ भन्ने कुरा पहिलोपटक थाहा पाएको भन्दै प्रजिअ पोख्रेलले सरकारको आधिकारिक निकायबाट त्यसको पुष्टि गर्ने प्रक्रिया सुरु गरेको जानकारी दिए ।