कावासोतीका तत्कालीन प्रमुख प्रशासकीय अधिकृत भूपेन्द्र पाण्डेयले नियमविपरीत भुक्तानी लिएको खुलासा

कावासोती । कावासोती नगरपालिकाको तत्कालीन प्रमुख प्रशासकीय अधिकृत भूपेन्द्र पाण्डेयले सरकारी रकम अनियमित रूपमा प्रयोग गरेको महालेखा परीक्षकको प्रतिवेदनले देखाएको छ । प्रतिवेदन अनुसार उनले विदेश भ्रमण जाँदा सरकारी रकम नियमविपरीत लिएको देखिएको छ । महालेखा परीक्षकको प्रतिवेदन अनुसार कावासोती नगरपालिकाको तत्कालिन प्रमुख प्रशासकीय अधिकृत पाण्डेयले विदेश भ्रमणसम्बन्धी सरकारी खर्च नियमावली विपरीत अनियमित रूपमा भुक्तानी लिएको पाईएको छ ।

नगरपालिकाको तत्कालीन प्रमुख प्रशासकीय अधिकृत श्री भुपेन्द्र पाण्डेय सन् २०२३ मे १९ मा स्पेनको म्याड्रिडस्थित लुम्बिनी गार्डेन फाउन्डेसनको निमन्त्रणामा स्पेन भ्रमणमा सहभागी भएका थिए । सो भ्रमणको सम्पूर्ण बसोबास तथा खानाको खर्च आयोजक संस्था आफैंले व्यहोर्ने गरी पत्राचारमार्फत स्पष्ट गरिएको थियो । तर नेपाल सरकारको भ्रमण खर्च नियमावली, २०६४ को नियम १४ (१) बमोजिम नेपाल सरकारले कर्मचारीलाई विदेश भ्रमणका लागि पठाउँदा खर्चको स्रोत र निजले पाउने भत्ताबारे पूर्व निर्णय गर्नुपर्ने व्यवस्था छ । यस प्रावधान अनुसार, नेपाल सरकारबाट भ्रमणको लागि खर्च व्यहोर्ने कुनै निर्णय वा सिफारिस भएको छैन् ।

त्यसैगरी, उपनियम (७) अनुसार, आयोजक संस्थाले खान बस्नको प्रबन्ध गरे तापनि खर्च नपु¥याएको प्रमाण कागजातसहित पेश भएमा सीमित दैनिक भत्ता लिन सकिने व्यवस्था भए पनि उक्त भ्रमणमा आयोजकले सम्पूर्ण खर्च व्यहोर्ने भनेकाले पालिकाबाट अतिरिक्त भुक्तानी लिन मिल्दैन । तर सो प्रावधान विपरीत तत्कालीन प्रमुख प्रशासकीय अधिकृत पाण्डेयले नगरपालिकाबाट तीन लाख पैंतीस हजार छ सय एकासी रुपैयाँ को भुक्तानी लिएको देखिएको छ । महालेखा परीक्षकको कार्यालयले यस खर्चलाई नियमबमोजिम नभएको उल्लेख गर्दै सो रकम तत्कालीन प्रमुख प्रशासकीय अधिकृत पाण्डेयबाट असुल गर्नुपर्ने प्रतिवेदनमा स्पष्टरूपमा उल्लेख गरेको छ ।