तरलता सहज बन्दै गएपछि घट्दै अल्पकालीन ब्याजदर

काठमाडौं । बैंकिङ प्रणालीमा तरलता सहज भएर अन्तर बैंक ब्याजदर घट्न लागेसँगै अल्पकालीन ब्याजदर पनि घट्दै गएको छ । सोमबार नेपाल राष्ट्र बैंकले छोटो अवधिको आन्तरिक ऋण उठाउने उपकरण (ट्रेजरी बिल बोलकबोल) गरेको थियो ।चालु आर्थिक वर्षमा १२ प्रतिशत नाघेको ट्रेजरी बिलको औसत डिस्काउन्ट रेट २९ जेठमा भएको बोलकबोलमा आयो भने आर्थिक वर्षको न्यून विन्दुमा झरेको छ । २८ दिन अवधिको ट्रेजरी बिलको औसत डिस्काउन्ट रेट भने १७ माघमा ५.९००१ प्रतिशत कायम भएकोमा सोमबार भएको बोलकबोलमा सो भन्दा माथि कायम भएको छ ।सोमबार नेपाल राष्ट्र बैंकले ९१ दिन अवधिको ३ अर्ब ५० करोडको नयाँ ट्रेजरी बिल बिक्रीमा ल्याएको थियो । यस्तै ४ वटा समयअवधिको २५ अर्बको ट्रेजरी बिल नवीकरणका लागि बोलकबोल गरेको थियो । जसमध्ये सोमबार भएको बोलकबोलमा २८ दिन अवधिको ट्रेजरी बिलको डिस्काउन्ट रेट ६.६८३७ प्रतिशत कायम भएको छ । जुन चालु आर्थिक वर्षको बोलकबोल भएकोमध्ये १७ माघको ५.९००१ पछिको न्यून दर हो ।

यस्तै ९१ दिन अवधिको ट्रेजरी बिलको औसत डिस्काउन्ट रेट ८.१३७० प्रतिशत कायम भएको छ । जुन चालु आर्थिक वर्षकै न्यून हो । १८२ दिन अवधिको ट्रेजरी बिलको डिस्काउन्ट रेट ८.०४४५ प्रतिशत र ३६४ दिन अवधिको ट्रेजरी बिलको डिस्काउन्ट रेट ८.१४७८ प्रतिशत कायम भएको छ । जुन चालु आर्थिक वर्ष लागेपछि भएको बोलकबोलको न्यून दर हो ।राष्ट्र बैंकले नीतिगत दर ७ प्रतिशत र बैंकदर ७.५ प्रतिशत कायम गरेको छ । बैंकिङ प्रणालीमा साधारण प्रकृतिको तरलता अभाव हुँदा विभिन्न औजार मार्फत बैंक दर र नीतिगत दरमा बैंकिङ प्रणालीमा तरलता पठाउने गर्छ ।तर, अहिले अन्तर बैंक ब्याजदर नै घटेका छ । नेपाल राष्ट्र बैंकको २७ जेठको तथ्यांक अनुसार बैंकहरुको औसत अन्तरबैंक ब्याजदर ६.३१ प्रतिशतमा झरेको छ । तरलता सहज भएर अन्तरबैंक ब्याजदर घट्न लागेपछि बैंकहरुले ट्रेजरी बिलमा बोलकबोल गर्ने ब्याजदर पनि घटाएका हुन् ।ट्रेजरी बिल एक वर्ष वा एक वर्षन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो । ट्रेजरी बिलहरू अवधिको आधारमा २८ दिने, ९१ दिने, १८२ दिने र ३६४ दिने गरी ४ किसिमका हुन्छन् ।