नवलपुर बारमा चुनावी सरगर्मी बढ्यो , अध्यक्षमा तीन जनाको उम्मेदवारी दर्ता

कावासोती । कानून ब्यवसायीहरुको छाता संगठन नेपाल बार एशोसिएसन नवलपुरको प्रथम जिल्ला अधिवेशनको सरगर्मी बढेको छ । नवलपुर जिल्ला अदालत गठन भएको एक बर्ष पछि नवलपुर बार एशोसिएसनको चुनाव हुन लागेको हो ।
मंसिर १५ गते शनिवार हुने निर्वाचनमा नेपाल कम्युनिष्ट पार्टी ( नेकपा) निकट कानून ब्यवसायीहरु संगठन नेप्लिज लयर्स एशोसिएसन तर्फबाट अध्यक्षमा अधिबक्ता भूपेन्द्र खनालको प्यानलले उम्मेदवारी दिएको छ । जसको उपाध्यक्षमा राजेन्द्र पोखरेल, सचिवमा दिपक भट्टाई, कोषाध्यक्षमा राधा उपाध्याय, सदस्यहरुमा चेतप्रसाद शर्मा, फेकुराम साह, टेकनारायण सुवेदी र बुद्धिराज पोखरेले उम्मेदवारी दिएका छन् । ११ सदस्यीय कार्यसमितिमा खनाल प्यानलले नौजनाको मात्र उम्मेदवारी दर्ता गरेको हो अधिबक्ता भोजराज दाहालले जानकारी दिनुभयो ।
त्यस्तै नेपाली काँग्रेस निकट कानून ब्यवसायीहरुको संगठन डेमोक्रेटिक लयर्स एशोसिएसन (डिएलए)का तर्फबाट अध्यक्षमा चेतनारायण भुसाल, उपाध्यक्षमा गणेश अधिकारी, सचिवमा जनक ढुङ्गाना सदस्यहरुमा अर्जुन काफ्ले, गणेश सिग्देल र पदमलाल चौधरीले उम्मेदवारी दिएका छन् । ११ सदस्य कार्यसमितिमा ६ जनाले मात्र उम्मेदवारी दिएका छन् । दुई तर्फबाट आबश्यक संख्यामा मात्र सदस्यको उम्मेदवारी परेकाले सातजना सदस्य र्निविरोध भएका छन् । भने कोषाध्यक्षमा नेप्लिज लयर्स एशोसिएसनकी उम्मेदवार राधा उपाध्याय र्निबिरोध भएकी छिन् ।
शनिवार हुने निर्वाचनमा अध्यक्षमा नेप्लिज लयर्स एशोसिएसन तर्फबाट अध्यक्षमा अधिबक्ता भूपेन्द्र खनाल डेमोक्रेटिक लयर्स एशोसिएसन (डिएलए)का तर्फबाट अध्यक्षमा चेतनारायण भुसाल, अध्यक्षमा स्वतन्त्र उम्मेवार गणेश सापकोटा सहित तीन जनाले प्रतिस्पर्धा गर्नेछन् । अध्यक्षका स्वतन्त्र उम्मेदवार सापकोटा कम्युनिष्ट कानून ब्यवसायीका केन्द्रीय सदस्य, तत्कालिन नेकपा ( एमाले) का जिल्ला सदस्य समेत हुन् ।
अन्य पदाधिकारीमा भने कम्युनिष्ट पार्टी र काँग्रेस पार्टीमा कानून ब्यवसायीहरुले प्रतिस्पर्धा गर्नेछन् । केन्द्रीय पार्षदमा भने एक जनामा अधिबक्ता भोजराज दाहाल र्निबिरोध हुनुभएको छ ।
चुनाव बार भवन कावासोतीमा शनिवार बिहान ११ बजे देखि ३ बजे सम्म हुने छ ।