दलित युवाको ह`त्या विरोधमा अनेरास्ववीयुको प्रदर्शन

कावासोती । अन्तरजातीय विवाहको निहुँमा पश्चिम रुकुममा दलित युवाको हत्या भएको घटनाको विरोधमा अनेरास्ववीयु नवलपुरले मंगलबार कावासोतीमा विरोध प्रदर्शन गरेको छ ।
जाजरकोटको भेरी नगरपालिका–४, रानागाउँका २१ वर्षीय नवराज विक सहित तिन जना युवाको हत्या भएको घटनाको विरोधमा मंगलबार अनेरास्वीयु नवलपुरका संयोजक ठाकुर पराजुलीको नेतृत्वमा कावासोतीमा प्ले कार्ड सहित विरोध प्रदर्शन भएको थियो । “जातीय विभेद माथिको बर्बरता कहिले सम्म ?, काहाँ छ समाज ?”, “अन्तरजातीय प्रेम सम्बन्धका कारण दलितको मृत्यु कहिले सम्म ?” लेखिएको प्ले कार्ड लिएर कावासोतीको साभापति चोक भेला भएका विद्यार्थीहरुले घटनाको विरोध गर्दै दोषिलाई तत्काल कारवाही गर्न माग गरेका छन् ।
प्रेमिकासंग विवाह गर्न गएका युवा सहितको उनको साथिहरुको हत्या भएको घटना मानवता विरुद्धको घटना भएको अनेरास्ववीयु नवलपुरका संयोजक ठाकुर पराजुलीले बताउनु भयो । जातीय आधारमा छुवाछुतलाई दण्डनीय अपराध भनेको ५७ वर्ष भएको तथा संसदबाट नेपाल छुवाछुतमुक्त राष्ट्र घोषणा गरेको १४ वर्ष हुदा समेत जातीय आधारमा विभेद अझ हत्या सम्मको घटना हुनु मानवता विरुद्धको अपराध भएको भन्दै पराजुलीले तत्काल घटनामा संलग्नलाई कारवाही गर्न माग गर्नु भयो ।
प्रेमिकासंग विवाह गर्न साथिहरु सहित रुकुम पश्चिमको चौरजहारी नगरपालिका–८, सोतीमा पुगेका नवराज विक सहितको युवाहरुलाई स्थानीयहरुले आक्रमण गरेका थिए । स्थानीयको आक्रमणबाट बच्न भाग्ने क्रममा नदीमा हामफालेका ६ जना बेपत्ता भएका थिए । जस मध्ये सोमबार साँझसम्म नवराज तथा उनका साथीहरुमध्ये गणेश बुढामगर र टीकाराम नेपालीको शव भेटिएको छ ।