प्रथम मध्यविन्दु कृषि, पर्यटन, व्यापारिक तथा सांस्कृतिक महोत्सव–२०७९ फागुन १८ देखि चोरमारामा हुने

चोरमारा । घरेलु तथा साना उद्योग महासंघ मध्यविन्दुको आयोजनामा प्रथम मध्यविन्दु कृषि, पर्यटन, व्यापारिक तथा सांस्कृतिक महोत्सव–२०७९ सञ्चालन हुने भएको छ । महासंघले आज पत्रकार सम्मेलन गरी मध्यविन्दु–७ चोरमारामा २०७९ फागुन १८ गते देखि फागुन २८ गते सम्म महोत्सव आयोजना गर्न लागेको जानकारी गराएको हो । “मध्यविन्दु समृद्धिको मुख्य आधार, संस्कृति संरक्षण तथा पर्यटन विकासमा पूर्वाधार” भन्ने मुख्य नारा सहित सञ्चालन हुने महोत्सवले स्थानीय स्तरमा उत्पादित उत्पादनहरुको बजारीकरण संगै यहाँका विभिन्न जातजातिहरुको कला र संस्कृति संरक्षणमा महत्वपूर्ण योगदान पु¥याउने महासंघका अध्यक्ष देवलाल काफ्लेले बताउनुभयो । महोत्सवमा घरेलु तथा साना उद्योगमा आधारित सामाग्रीहरुको पर्दशनी संगै स्थानीय समुदायको परिकारहरुलाई प्राथमिकताका साथ राखिने उहाँले बताउनुभयो । महोत्सवमा एक सय भन्दा बढी स्टल रहेछन् भने विभिन्न बाल उद्यान लगायतका पर्दशनी संगै स्थानीय तथा राष्ट्रिय कलाकारहरुको समेत प्रस्तुत रहनेछ । ११ दिन सम्म सञ्चालन हुने महोत्सवमा एक करोड पचास लाख वराबरको आर्थिक करोबार हुने विश्वास रहेको आयोजक संस्थाका महासचिव विशाल थापाले बताउनुभयो । आर्थिक रुपमा देखिएको समस्याबाट व्यवसायिक तथा पर्यटकीय गतिविधिहरु सुस्त भइरहेको हालको अवस्थामा महोत्सवले स्थानीय व्यवसायिहरुको व्यपार पर्वद्धनमा टेवा पुग्ने उहाँले बताउनुभयो । मध्यविन्दु नगरपालिकामा यस अगाडी विभिन्न संघसंस्थाको आयोजनामा भएको सिकाईबाट यस महोत्सवलाई कसरी फरक र सफल बनाउन सकिन्छ भन्ने विषयमा संस्था गम्भीर रहेको उहाँले बताउनुभयो ।

महोत्सवलाई सफल बनाउन विभिन्न संघसंस्था संग आवश्यक सहकार्यहरु समेत गरिएको अध्यक्ष देवलाल काफ्लेले बताउनुभयो । महोत्सवमा चोरमारा युवा क्लव र लोहासेधारा युवा क्लव सह–आयोजक संस्था, मध्यविन्दु उद्योग वाणिज्य संघ पर्वद्धक र मध्यविन्दु नगरपालिकालाई संरक्षक संस्थाको रुपमा राखिएको छ । महोत्सवले मध्यविन्दु नगरपालिकाको स्थानीयतालाई प्रतिनिधित्व गर्नको लागि मध्यविन्दु नगरपालिकाका पूर्व नगर प्रमुख चन्द्रबहादुर रानाले शुभेच्छा संगै सुझाव व्यक्त गर्नुभयो । मध्यविन्दु नगरपालिकाको समृद्धि यहाँको स्थानीय कृषि, पर्यटनबाट सम्भव रहेको भन्दै उहाँले सोही अनुसारको काम गर्न समेत सुझाव दिनुभयो । उहाँले मध्यविन्दु नगरपालिका भित्र बसोबास गर्ने विभिन्न आदिबासी समुदायको विविधतालाई समेत महोत्सवमा प्रस्तुत गर्नको लागि अनुरोध गर्नुभयो । महोत्सवलाई स्थानीय स्तरमा रहेका संघसंस्थाको तर्फबाट आवश्यक सहयोग रहने बिजय सामुदायिक वन उपभोक्ता समुहका अध्यक्ष श्याम पौडेलले बताउनुभयो । पत्रकार सम्मेलनमा घरेलु तथा साना उद्योग महासंघ मध्यविन्दुका पदाधिकारी, चोरमारा युवा क्लव, लोहासेधारा युवा क्लवमा प्रतिनिधिहरुको समेत उपस्थिति रहेको थियो ।