नवलपुरमा फेला परेका बाढीका शवमध्ये १५ जनाको पहिचान खुल्यो, आफन्तले बुझ्ने क्रम जारी

कावासोती । रसुवाको भोटेकोशी नदीमा आएको बाढीपछि नारायणी नदी हुँदै नवलपुरसम्म बगाएर ल्याइएका शवमध्ये हालसम्म १५ जनाको पहिचान खुलेको छ। पहिचान खुलेका शवमध्ये केही आफन्तले बुझिसकेका छन् भने केही शव बुझ्ने प्रक्रिया जारी रहेको प्रहरीले जनाएको छ। नवलपुरका विभिन्न स्थानमा फेला परेका शव तथा मानव अङ्गमध्ये पहिचानका लागि आवश्यक प्रक्रिया अघि बढाइएपछि मृतकको नाम र ठेगाना खुलेको हो। पहिचान खुलेका मृतकहरू विभिन्न ११ जिल्लाका रहेका छन्। प्रहरीका अनुसार मकवानपुरका २ जना सुमन गोले (२४) र उद्धव खड्का (३६) रहेका छन्। त्यस्तै गोरखाका ३ जना सुजाता कौडाल (४२), कमला देवकोटा (५१) र केदार पण्डित (४०) को पहिचान खुलेको छ। नुवाकोटका २ जना शारदा ढकाल (५६) र राजकुमार तामाङ (५), चितवनका विमल काफ्ले (२८), अर्घाखाँचीका नारायणबहादुर थापा (४५), नवलपरासी पश्चिमका यादव भण्डारी (३७) र धादिङका संजोग घर्ती मगर (४२) को पनि पहिचान भएको प्रहरीले जनाएको छ।

यसैगरी सप्तरीका सन्तोष (२८), काभ्रेपलाञ्चोकका हरिबादुर कायस्थ (४६), काठमाडौंका पुण्यबहादुर जे.के. (३४) र रसुवाका जहमा लोप्चन (३४) को समेत पहिचान खुलेको छ।

पहिचान खुलेपछि सम्बन्धित जिल्लाका आफन्त तथा परिवारजन नवलपुर आउने क्रम बढेको छ। आवश्यक कानुनी तथा प्रशासनिक प्रक्रिया पूरा गरी केही शव आफन्तलाई बुझाइसकिएको र बाँकी शव बुझाउने प्रक्रिया भइरहेको प्रहरीले जनाएको छ। भोटेकोशी बाढीपछि नारायणी नदीमा बगाएर ल्याइएका शव नवलपुरका विभिन्न स्थानमा भेटिने क्रम अझै रोकिएको छैन। फेला परेका पहिचान नखुलेका शवको आवश्यक नमुना संकलन, अभिलेख राख्ने तथा पहिचानको प्रक्रिया पनि निरन्तर भइरहेको छ।