युवा नेतृत्वको खोजीमा कांग्रेस : नवलपुर क्षेत्र नं. २ को क्षेत्रीय सभापतिमा जितबहादुर थापा क्षेत्रीको उम्मेदवारी

नवलपुर । विद्यार्थी जीवनदेखि नै नेपाली कांग्रेसको राजनीतिसँग जोडिँदै आएका जितबहादुर थापा क्षेत्री नेपाली कांग्रेसको १५औँ महाधिवेशन अन्तर्गत नवलपुर क्षेत्र नं. २ को क्षेत्रीय सभापति पदमा उम्मेदवार बनेका छन्। मध्यविन्दु नगरपालिका–५ बाघखोर निवासी थापा क्षेत्रीले काठमाडौंको सरस्वती क्याम्पसमा अध्ययनरत रहँदै नेपाल विद्यार्थी संघमार्फत राजनीतिक यात्रा सुरु गरेका थिए। विद्यार्थी संगठनबाट सुरु भएको उनको राजनीतिक यात्रा क्रमशः स्थानीय तहको पार्टी संगठनसम्म विस्तार हुँदै आएको छ। मध्यविन्दु नगरपालिकाको उपसभापतिको जिम्मेवारीसमेत सम्हालिसकेका थापा क्षेत्रीले संगठन निर्माण र कार्यकर्तासँगको निरन्तर सम्पर्कमा सक्रिय भूमिका निर्वाह गर्दै आएका छन्। पछिल्लो राजनीतिक घटनाक्रमपछि तत्कालीन सभापति दोमनबहादुर भण्डारी राष्ट्रिय स्वतन्त्र पार्टीमा प्रवेश गरेपछि उत्पन्न परिस्थितिमा पार्टी संगठनलाई निरन्तरता दिन कार्यवाहक सभापतिको जिम्मेवारी सम्हाल्दै संगठनलाई सक्रिय राख्न भूमिका खेलेको उनले बताएका छन्। कार्यवाहक सभापतिको जिम्मेवारीमा रहँदा संगठनलाई चलायमान बनाउने, कार्यकर्तासँगको सम्बन्ध कायम राख्ने तथा पार्टी गतिविधिलाई निरन्तरता दिने काममा आफू सक्रिय रहेको थापा क्षेत्रीको भनाइ छ।
युवा पुस्ताबाट क्षेत्रीय नेतृत्वको दाबी
लामो समयदेखि कांग्रेसको संगठनमा सक्रिय रहँदै आएका थापा क्षेत्रीले अब क्षेत्रीय नेतृत्वमा आफ्नो दाबी प्रस्तुत गरेका हुन्। युवा उमेरमै पार्टी संगठनको विभिन्न तहमा काम गरेको अनुभवलाई क्षेत्रीय नेतृत्वमा उपयोग गर्ने उनको उद्देश्य छ। पार्टीलाई नयाँ पुस्तासँग जोड्न, संगठनलाई थप गतिशील बनाउन र कार्यकर्ताको भावना तथा अपेक्षालाई नेतृत्वसँग जोड्न आफूले उम्मेदवारी दिएको थापा क्षेत्रीले बताएका छन्। “विद्यार्थी जीवनदेखि कांग्रेसको संगठनमा जोडिएर काम गर्दै आएको छु। संगठनलाई कठिन परिस्थितिमा समेत निरन्तरता दिने जिम्मेवारी पाएर काम गरेको अनुभव छ। अब त्यही अनुभवलाई क्षेत्रीय संगठन निर्माणमा उपयोग गर्ने उद्देश्यले सभापतिमा उम्मेदवारी दिएको हुँ,” थापा क्षेत्रीले बताए।
संगठनलाई चलायमान बनाउने लक्ष्य
थापा क्षेत्रीले कांग्रेसको क्षेत्रीय संगठनलाई थप व्यवस्थित, सक्रिय र कार्यकर्तामुखी बनाउने विषयलाई प्राथमिकतामा राखेका छन्। युवा पुस्ताको सहभागिता बढाउँदै पार्टी संगठनलाई समयअनुकूल बनाउने र स्थानीय तहदेखि क्षेत्रीय तहसम्म संगठनलाई बलियो बनाउने उनको जोड छ।
विद्यार्थी राजनीतिबाट सुरु भएको राजनीतिक यात्रा, मध्यविन्दु नगरपालिकाको उपसभापतिको जिम्मेवारी र कार्यवाहक सभापतिका रूपमा संगठन सञ्चालन गरेको अनुभवलाई आधार बनाउँदै जितबहादुर थापा क्षेत्री अहिले नवलपुर क्षेत्र नं. २ को क्षेत्रीय नेतृत्वका लागि मैदानमा उत्रिएका छन्।
युवा पुस्तामाझ सक्रिय रहँदै आएका थापा क्षेत्रीको उम्मेदवारीसँगै नवलपुर क्षेत्र नं. २ को कांग्रेसभित्र युवा नेतृत्व र संगठनको भावी दिशाबारेको बहससमेत चासोको विषय बनेको छ।