३० वर्षीय सिए योगेश पंगेनीको दाबी  :  कांग्रेस महाधिवेशनमा युवा पुस्ताको बलियो उपस्थिति खोज्दै उम्मेदवारी

चापाकोट । नेपाली कांग्रेसको १५ औँ महाधिवेशनमा स्याङ्जा क्षेत्र नम्बर २ बाट महाधिवेशन प्रतिनिधिका रूपमा युवा पुस्ताका योगेश पंगेनीले उम्मेदवारी प्रस्तुत गरेका छन्। चापाकोट–१०, आदीघाटका ३० वर्षीय पंगेनी पेशाले चार्टर्ड एकाउन्टेन्ट (सिए) हुन्। व्यावसायिक क्षेत्रमा हासिल गरेको अनुभवसँगै पार्टीको संगठन, नीति निर्माण र निर्णय प्रक्रियामा युवा पुस्ताको सक्रिय सहभागिता आवश्यक रहेको भन्दै उनी महाधिवेशन प्रतिनिधिका रूपमा अघि सरेका हुन्। चापाकोटलाई नेपाली कांग्रेसको पुरानो प्रभाव क्षेत्रका रूपमा चिनिँदै आएको पृष्ठभूमिमा आदीघाटबाट पंगेनीको उम्मेदवारीलाई युवा पुस्ताको नयाँ दाबीका रूपमा हेरिएको छ। लामो समयदेखि कांग्रेसको संगठनसँग जोडिँदै आएको चापाकोटबाट पंगेनीले अब युवाको सोच, ऊर्जा र पेशागत अनुभवलाई पार्टीको निर्णय तहसम्म पुर्‍याउने एजेन्डासहित आफ्नो उम्मेदवारी अघि सारेका छन्।

पंगेनीले कांग्रेसको नेतृत्व र निर्णय प्रक्रियामा युवाको सहभागिता केवल नारामा सीमित नभई व्यवहारमै स्थापित हुनुपर्ने बताएका छन्। अग्रजको अनुभवलाई सम्मान गर्दै नयाँ पुस्ताको क्षमता, प्रविधिसँगको पहुँच र बदलिँदो समयअनुसारको सोचलाई पार्टीको आगामी यात्रासँग जोड्न आफूले भूमिका खेल्ने उनको भनाइ छ। “युवाको आवाज सुन्ने मात्र होइन, निर्णय गर्ने तहमा युवाको अर्थपूर्ण सहभागिता आवश्यक छ,” पंगेनीले भनेका छन्, “अग्रजको अनुभव र युवाको ऊर्जा एकै ठाउँमा जोडेर पार्टीलाई समयअनुकूल बनाउन मेरो उम्मेदवारी हो।”

पंगेनीले युवाका सवालसँगै रोजगारी, उद्यमशीलता, आर्थिक अनुशासन, नेतृत्व विकास तथा प्रविधिमैत्री संगठन निर्माणका विषयलाई प्राथमिकताका साथ उठाउने बताएका छन्। चार्टर्ड एकाउन्टेन्टका रूपमा आफ्नो पेशागत ज्ञान र अनुभवलाई राजनीतिक तथा संगठनात्मक क्षेत्रमा समेत उपयोग गर्दै पार्टीभित्र नीतिगत बहसलाई थप प्रभावकारी बनाउने उनको भनाइ छ। ३० वर्षको उमेरमै महाधिवेशन प्रतिनिधिका रूपमा अघि बढेका पंगेनीले स्याङ्जा क्षेत्र नम्बर २ का कांग्रेस प्रतिनिधिहरूसँग आफ्नो उम्मेदवारीलाई समर्थन गर्दै अमूल्य मत र विश्वास प्रदान गर्न आग्रह गरेका छन्। उनको उम्मेदवारीसँगै क्षेत्र नम्बर २ को महाधिवेशन प्रतिनिधि छनोटमा युवा पुस्ताको सहभागिता, नयाँ पुस्ताको नेतृत्व र पेशागत दक्षतालाई पार्टीको निर्णय तहमा पुर्‍याउने बहससमेत थप चर्किएको छ।